Արդեն 10 տարուց ավել է, ինչ մենք աշխատում ենք Հայաստանում. այս ընթացքում մի քանի գեղեցիկ ջերմոցներ ենք հիմնել, և բազմաթիվ հաճախորդներ ունենք, որ մեզ հետ երկար ժամանակ է՝ աշխատում են։ Այս մասին Հոլանդիայում ՀՀ վարչապետ Նիկոլ Փաշինյանի հետ հանդիպման շրջանակներում «Առաջին լրատվական»-ի հետ զրույցում նշեց հոլանդական «Պրիվա» ընկերության մենեջեր Պաուլինա Կոմորովսկան՝ անդրադառնալով հարցին, թե որքանով են իրենց որպես գործարարներ, հետաքրքրված Հայաստանով, ինչ ներդրումային ծրագրեր են ցանկանում իրագործել:
«Բայց մենք ցանկանում ենք ավելին անել։ Մենք ուզում ենք ամուր կապեր ստեղծել կառավարության մակարդակում և գտնել նոր հնարավորություններ հայաստանցիներին փոխանցելու մեր գիտելիքները բուսաբուծության ոլորտում»,-ասաց նա:
Կոմորովսկան տեղեկացրեց, որ վերջին 10 տարիների ընթացքում շուրջ 15 անգամ եղել է Հայաստանում. «Հիմնականում Երևանում եմ մնացել, բայց հնարավորություն եմ ունեցել նաև այցելել Գողթ, տեսնել Գեղարդի վանքը։ Գիտեմ, որ մարդիկ շատ բաց են և շատ հուսալի բիզնես գործընկերներ են մեզ համար, և մենք հարգում ենք նրանց։ Բացի այդ, ջերմոցային տնտեսությունների ոլորտում գոհացուցիչ առաջընթաց ենք նկատում վերջին 10 տարիների ընթացքում։ Ես կարծում եմ՝ սա ճիշտ ուղղություն է Հայաստանում բուսաբուծության զարգացման համար»,-ասաց կին գործարարը: