Եվրոպական միության ֆինանսավորմամբ Վորլդ Վիժն Հայաստանի կողմից իրականացվող «Ընտանեկան միջավայր և համայնքային ծառայություններ Հայաստանի երեխաների համար» ծրագրի շնորհիվ 506 երեխա վերադարձել է ընտանիք։
Ընտանիքի միջազգային օրվան ընդառաջ Եվրոպական միության ֆինանսավորմամբ Վորլդ Վիժն Հայաստանի կողմից իրականացվող «Ընտանեկան միջավայր և համայնքային ծառայություններ Հայաստանի երեխաների համար» ծրագրի շրջանակներում մայիսի 13-ին Գյումրի քաղաքի «Թումո» ստեղծարար տեխնոլոգիաների կենտրոնում կայացավ «Երեխան պետք է մեծանա ընտանիքում» խորագրով համաժողովը, որից հետո Գյումրիի Դրամատիկական թատրոնի շենքում հատուկ միջոցառմամբ Ընտանիքի օրը նշեցին նախկինում գործող շուրջօրյա խնամքի հաստատություններից ընտանիք վերադարձած երեխաներն ու իրենց ծնողները։
Միջոցառմանը ներկա էին Հայաստանում Եվրոպական միության դեսպան Անդրեա Վիկտորինը, Շիրակի մարզպետ Նազելի Բաղդասարյանը, ՀՀ ԱԺ Առողջապահության և սոցիալական հարցերի մշտական հանձնաժողովի նախագահ Հերիքնազ Տիգրանյանը և Վորլդ Վիժն Հայաստանի տնօրեն Րաֆֆի Դուդակլյանը։
«Ընտանեկան միջավայր և համայնքային ծառայություններ Հայաստանի երեխաների համար» ծրագիրը Հայաստանում իրականացվում է 2019թ․-ից, ծրագրի գլխավոր նպատակն է կանխել մանկալքությունը և երեխաների կրկնակի մուտքը խնամքի հաստատություններ՝ բարձրացնելով կյանքի դժվարին իրավիճակներում հայտնված ընտանիքների դիմակայունությունը։
Համաժողովի ընթացքում ներկայացվեց 3 տարում իրականացված աշխատանքը։ Ծրագրի արդունքում՝ շուրջօրյա խնամքի հաստատություններից ընտանիքների հետ վերամիավորվել է 506 երեխա, յուրաքանչյուր ընտանիքի հետ իրականացվել է անհատական աշխատանք՝ գնահատվել են նրանց սոցիալական կարիքները։ Կարիքների գնահատման արդյունքում ավելի քան 200 ընտանիքի հետ իրականացվել է աղքատության փուլային հաղթահարմանն ուղղված միջամտություն՝ ընտանիքները տնտեսապես կայունացնելու նպատակով։
Իր ողջույնի խոսքում Եվրոպական միության դեսպան Անդրեա Վիկտորինը նշեց․ «Ընտանիքը պետք է լինի ապահով տեղ, որտեղ յուրաքանչյուրը կարող է գտնել և վայելել հոգատարություն, որտեղ տիրում է արդարությունը, որը պարգև է՝ ի նպաստ ներդաշնակ և հավասարակշռված կյանքի։ Անկախ ամեն ինչից, այն մնում է ամենաթանկարժեքը մարդկության համար։ Ներդրումներ կատարելով ընտանիքներում՝ մենք ներդրումներ ենք անում ապագայի համար»։
Վորլդ Վիժն Հայաստանի տնօրեն Րաֆֆի Դուդակլայնն իր խոսքում շնորհակալություն հայտնեց Եվրոպական միությանն ու պետական կառույցներին երեխային ընտանեկան միջավայրում պահելու գաղափարի իրագործմանն աջակցելու համար․ «Այս ծրագիրն ունի շատ կարևոր առաքելություն և գաղափարախոսություն․ երեխան պետք է մեծանա ընտանիքում և հասարակական սեկտորն ու պետությունը պետք է հնարավորինս նպաստեն երեխային ընտանիք վերադարձնելու և ընտանիքում պահելու գործընթացին։ Եվրամիության աջակցության շնորհիվ, և համագործակցելով պետական ինստիտուտների, մարզային կառույցների, հասարակական այլ կազմակերպությունների հետ երեք տարվա ընթացքում կրողացել ենք ընտանիք վերադարձնել 506 երեխայի։ Ես լիահույս եմ, որ այս գործընթացը կլինի շարունակական»,-ասել է նա։
