Դուշանբեում երեկ տեղի է ունեցել Հայաստանի, Ռուսաստանի ու Ադրբեջանի արտգործնախարարների հանդիպումը։ Հայաստանի ԱԳՆ մամուլի ծառայությունից հայտնում են, թե քննարկվել է եռակողմ հայտարարություններով ստանձնած հանձնառությունների կատարման ընթացքը: Մտքեր են փոխանակվել տարածաշրջանային կոմունիկացիաների և տնտեսական կապերի ապաշրջափակման, սահմանազատման և սահմանային անվտանգության հարցերով հանձնաժողովի ստեղծման և Հայաստանի ու Ադրբեջանի միջև հարաբերությունների կարգավորման պայմանագրի վերաբերյալ։ Նախարար Միրզոյանը վերահաստատել է հայկական կողմի դիրքորոշումը Լեռնային Ղարաբաղի հակամարտության համապարփակ կարգավորման շրջանակներում արցախահայության անվտանգության, իրավունքների և ազատությունների երաշխավորման, ինչպես նաև Լեռնային Ղարաբաղի կարգավիճակի վերաբերյալ։ Հայաստանի արտաքին գործերի նախարարը շեշտել է նաև 44-օրյա պատերազմի հետևանքով ստեղծված հումանիտար խնդիրների շուտափույթ լուծման կարևորությունը՝ այդ թվում հայ ռազմագերիների անհապաղ հայրենադարձման անհրաժեշտությունը։ Թեմայի շուրջ «Առաջին լրատվական»-ը զրուցել է քաղաքագետ Ռոբերտ Ղևոնդյանի հետ:
Ղևոնդյանի խոսքով՝ նշաձողը իջեցված չէ, Ադրբեջանը Դուշանբեում չի ստացել այն, ինչ ակնկալում էր․ «Դուշանբեում համաձայնության հասնել դեռևս չի հաջողվել: Որևէ փաստաթղթի ստորագրում չի երաշխավորում, որ սադրանքներ չեն լինի: Հայաստանը պետք է խուսափի այս փուլում Ադրբեջանի հետ որևէ փաստաթուղթ ստորագրելուց»:
