«Հայրենիք» կուսակցության ղեկավար, «Պատիվ ունեմ խմբակցության ղեկավար Արթուր Վանեցյանը նախօրեին լրագրողների հետ զրույցում ասել է, որ Ֆրանսիայի հրապարակում կան մարդիկ, որոնց ներկայությունը հարվածում է իրենց շարժմանը, բայց ինքը չի կարող այդ մարդկանց արգելել ներկա լինել հրապարակում, գալ հրապարակ: Վանեցյանը չի տվել անուններ, չի ասել, թե հատկապես ո՞ր մարդկանց մասին է խոսքը, սակայն արել է մեկ այլ հատկանշական հայտարարություն: Ըստ նրա, եթե հանրահավաքը լիներ «Հայրենիք» կուսակցության կամ «Պատիվ ունեմ» դաշինքինը, ապա իրենք կորոշեին ներկաների շրջանակը, սակայն հանրահավաքը ժողովրդական է, համաժողովրդական, հետևաբար չեն կարող որևէ մեկին արգելել ներկա լինել այնտեղ:
Արթուր Վանեցյանն իհարկե բավականին դիվանագիտորեն խուսափում է ասել, որ Ֆրանսիայի հրապարակում հավաքվում են ոչ միայն Հայրենիքի կամ Պատիվ ունեմի՝ ներառյալ ՀՀԿ, այլ նաև Ռոբերտ Քոչարյանի և ՀՅԴ «կոմունիկացիաներով» եկող մարդիկ և իրենք կարող են պատասխանատու լինել նրանց համար, ովքեր գալիս են իրենց կոմունիկացիայով, այլ ոչ թե Ռոբերտ Քոչարյանի կամ ՀՅԴ-ի, կամ այլ կերպ ասած՝ Հայաստան դաշինքի: Ի վերջո միամտություն է կարծել, թե այդ երկու ուժերից զատ՝ Հայաստան ու ՊՈՒ դաշինքներ, փողոցում տեղի ունեցողն ունի կազմակերպական-առաջնորդող այլ բեվեռներ: Մնացյալը հարակից միավորներ են, այս կամ այն թևից, ու հրապարակում չեն կարող հայտնվել այնպիսի պատահական մարդիկ, որոնք հարվածում են այդ ուժերի շարժմանը: Իհարկե կարող են հայտնվել ամենատարբեր քաղաքացիներ, սակայն հասկանալի է, որ «հարվածող» կարող են լինել հենց ոչ պատահական, այսպես ասած լայն հանրությանը այս կամ այն կերպ հայտնի մարդիկ: Իսկ նրանցից որևէ մեկը հրապարակում անկասկած ինքնագլուխ չէ, որ հայտնվում է: Ահա այդ իմաստով, Արթուր Վանեցյանը փաստորեն քարը նետում է Ռոբերտ Քոչարյանի կողմ, դիվանագիտորեն ասելով, թե հանրահավաքը ժողովրդական է՝ համաժողովրդական, բայց բավականին թափանցիկ կերպով ակնարկելով, որ «հարվածող» իմիջով անձինք հայտնվում են հենց այդ թևից:
Չի բացառվում իհարկե, որ ԱԱԾ նախկին պետը կարող է նկատի ունենալ մինչև անգամ հենց Ռոբերտ Քոչարյանին, որը ևս՝ պարբերաբար հայտնվում է հրապարակում: Ի դեպ, այդ առումով բավականին խոսուն է «պատահականորեն» ՀՀԿ փոխնախագահի տելեգրամյան ալիքում հայտնված և հետո հեռացված ձայնագրությունը՝ Նաիրա Զոհրաբյանի ձայնով, որտեղ Զոհրաբյանը խոսում է, թե՝ «Ռոբի մասնակցությունը վանում է շատերին»: Իհարկե դրվագը այս պարագայում հիշարժան է լոկ փաստարկելու տեսանկյունից, որ ՊՈՒ խմբակցության ղեկավարի՝ Հայրենիք կուսակցության առաջնորդ Արթուր Վանեցյանի խոսքերը ավելի լայն տրամադրությունների համատեքստում են, որ առկա են Ֆրանսիայի հրապարակի առնվազն մի մասում, որից փաստորեն հերթական քարն է նետվում դեպի հրապարակի այն մաս, որտեղ Ռոբերտ Քոչարյանն է:
Խոշոր հաշվով, ներընդդիմադիր տարակարծությունների և անգամ հակասությունների մասին խոսել եմ բազմիցս, դիտարկելով նաև դրանց բավականին խորքային արմատները, որ հասնում են ընդհուպ 2003-04 թվականներ, երբ այսօր խորհրդարանական երկու ընդդիմադիր ուժերի առաջնորդները իշխանության առաջնային երկու դեմքերն էին: Ներկայումս՝ թե կարգավիճակի, թե ժամանակի փոփոխությամբ, այդ տարակարծություններն ու հակասությունները ենթարկվում են տրանսֆորմացիայի, ինչը ոչ միայն տեղի է ունենում նաև փողոցային շարժման գործընթացում, այլ թերևս շարժումն ինքնին նաև այդ տրանսֆորմացիայի յուրօրինակ արտահայտություններից մեկն էր: