ՌԴ նախագահի խոսնակ Դմիտրի Պեսկովն անդրադարձել է Ֆինլանդիայի՝ ՆԱՏՕ-ին անդամակցելու որոշմանը։
Պեսկովի խոսքով՝ ՆԱՏՕ-ի ընդլայնումը չի նպաստում Եվրասիայի անվտանգությանը, Ֆինլանդիայի մուտքը դաշինք սպառնալիք է Ռուսաստանի համար:
Ըստ նրա. «Անշուշտ: ՆԱՏՕ-ի հերթական ընդլայնումը մեր մայրցամաքն ավելի կայուն և անվտանգ չի դարձնում»։
Նա նաև հավելել է, որ Ռուսաստանի Դաշնությունը կվերլուծի ՆԱՏՕ-ին Ֆինլանդիայի անդամակցության հետ կապված իրավիճակը և կմշակի անվտանգության ապահովման համար անհրաժեշտ միջոցներ։
Միևնույն ժամանակ, Ռուսաստանի պատասխան գործողությունները կախված կլինեն նրանից, թե դաշինքի ռազմական ենթակառուցվածքն ինչ աստիճանի առաջ կբերվի դեպի ՌԴ սահմաններ:
Պեսկովը նաև հայտարարել է, թե բոլորը ցանկանում են խուսափել Ռուսաստանի և ՆԱՏՕ-ի միջև ուղիղ բախումից, բայց միևնույն ժամանակ Մոսկվան պատրաստ է վճռական պատասխան տալ ցանկացած կողմին, որը կփորձի մտնել Ուկրաինայում հատուկ գործողության մեջ։
ՌԴ նախագահի խոսնակի խոսքով. «Ռուսաստանի և ՆԱՏՕ-ի միջև ուղիղ բախումից ցանկանում են խուսափել բոլորը, նաև Ռուսաստանը: Դա բազմիցս հայտարարվել է նաև ՆԱՏՕ-ում, և, կարծում եմ, ամենակարևորը Վաշինգտոնում: Այդ թվում, ամենաբարձր մակարդակով, նման հայտարարություններ արել է նախագահ Բայդենը: Դա այն է, ինչից բոլորը կցանկանային խուսափել»։
Միաժամանակ Պեսկովը շեշտել է. «Այն, որ Ռուսաստանը պատրաստ կլինի ամենավճռական պատասխանը տալ այն կողմին, որը փորձում է ինչ-որ կերպ մտնել Ուկրաինա և մտնել հատուկ ռազմական գործողության մեջ, որն այժմ իրականացնում են ՌԴ Զինված ուժերը»։