Արցախի դատախազությունն օրերս հայտարարություն տարածեց, որ մայիսի 10-ի երեկոյան Ստեփանակերտի «Վերածննդի» հրապարակում հնչել են կրակոցներ, որի հետևանքով վնասվել էր Ստեփանակերտ քաղաքի բնակչին պատկանող ավտոմեքենան։ Ավելի ուշ պարզ դարձավ, որ հնչած կրակոցների դեպքի առթիվ հարուցված քրեական գործով ձերբակալվել է Արցախի հերոս Սամվել Կարապետյանը: Արցախի նախագահի խոսնակ Լուսինե Ավանեսյանը տեղեկացրել է, որ գործը գտնվում է իրավապահ մարմինների լիազորությունների տիրույթում: «Չնայած այն հանգամանքին, որ Արցախի նախագահը անցած ժամերի ընթացքում Սամվել Կարապետյանին աջակցող դիմումներ է ստացել և ինքն էլ բարձր է գնահատում Հայրենիքի պաշտպանության գործում պարոն Կարապետյանի ունեցած վաստակը, սակայն իրավասու չէ որևէ կերպ միջամտել իրավապահների աշխատանքին:Արցախի Հանրապետությունում բոլորն օրենքի առջև հավասար են, և այս առումով Նախագահը բազմիցս հայտարարել է, որ Արցախում արտոնյալներ չպետք է լինեն»,- մասնավորապես նշել է Լուսինե Ավանեսյանը:
«Հելսինկյան նախաձեռնություն-92»-ի ԼՂՀ կոմիտեի համակարգող, խաղաղության և մարդու իրավունքների միջազգային մրցանակների դափնեկիր, արցախցի իրավապաշտպան Կարեն Օհանջանյանի համոզմամբ՝ Արցախի նախագահը ճիշտ է, օրենքի առաջ բոլորը հավասար են։ Ըստ Օհանջանյանի՝ պետք է ցույց տրվի ոչ միայն խոսքով, այլ գործնականում դա իմպլեմենտացնելով․ «Եվ այստեղ ոչ մի տարբերություն չկա՝ դու ինչ ունես արած պետության համար, պետության հիմնադիրներից ես, Արցախի հերոս, թե հասարակ քաղաքացի։ Ամեն մեկն իր արարքների համար պետք է պատասխան տա։ Հենց այդ ֆունդամենտալ սկզբունքով էլ պետք է առաջ շարժվենք։ Օրինակ՝դու կարող ես լինել նախարար, քո ու քո թիմի անունը դուրս գա որպես կաշառակեր, բայց քեզ ոչ մի բան չեն անում, որովհետև քո մեջքին մարդիկ կան կանգնած և ոչ միայն Ղարաբաղից։ Նման երկակի ստանդարտներ չպետք է լինեն երկրում»,-«Առաջին լրատվական»-ի հետ զրույցում ասաց նա։
Միևնույն ժամանակ Օհանջանյանը հիշեցրեց, որ խոսքի մակարդակով մշտապես ասվել է, որ բոլորն օրենքի առաջ հավասար են, սակայն գործնականում այդ սկզբունքը երբեմն չի պահպանվել․ «Նաև ուզում եմ ասել, որ կարող եմ հասկանալ ստեղծված իրավիճակը, թե ինչու նա գնաց ծայրահեղ քայլի, բայց մարդը պետք է հասկանա, որ իր ծայրահեղ քայլերով վտանգել է ուրիշի կյանքն ու հասարակության անդորրը։ Նման արարք կատարողը պետք է շատ խստորեն պատասխան տա օրենքի առաջ՝ մանավանդ հիմա, երբ զենքեր են տրամադրում մարդկանց, ովքեր այս վերջին պատերազմում ներդրում են ունեցել։ Դա զենք կիրառելու որոշակի գայթակղություն է ստեղծում։ Եթե նման միջադեպը լուրջ քննադատության չարժանանա ու իրավական գնահատական չտրվի, ապա դա ռիսկ է ստեղծում, որ շատերը զենք կօգտագործեն, ինչն էլ երկրում քաոս կստեղծի»,-ասաց մեր զրուցակցիը։
Նա նաև հիշեցրեց, որ այդպիսի միջադեպեր շատ են եղել առաջին պատերազմի ժամանակ, 1992-1995 թվականներն․ «Եվ վերջապես ունենք Սամվել Բաբայանի նախադեպը։ Նա Արկադի Ղուկասյանի դեմ մահափորձ է արե և շատ բանակայիններ, պատիվ ունեցող մարդիկ մասնակից են եղել այդ տեռորիստական ակտին։ Դուք գիտեք, որ դրան այն ժամանակ իրավական գնահատական տրվեց, դատարանը պատժեց այդ գործողության մասնակցիներին։
Այժմ էլ Օգանովսկին պետք է պատասխան տա»,-նշեց Օհանջանյանը։
Իրավապաշտպանը նաև նշեց, որ պետությունը ևս անելիք ունի, պետք է մեքենաների համապատասխան վայրում կայանման մասին մտածի․ «Հրապարակը որպես կայանատեղի չպետք է օգտագործվի։ Վերջապես ցիվիլ պետություն ենք, գյուղի մայդանում չենք ապրում» ։
Ինչ վերաբերում է այն հարցին, որ Օգանովսկու համար Արցախի նախագահին դիմումներ են ուղղվոմւ, մեր զրուցակիցն ասաց, որ այդ դիմումները պետք է ուղղվեն ոչ թե նախագահին, այլ միջնորդություններ ներկայացվեն դատարան․ «Այդ ժամանակ էլ դատարանը թող ուսումնասիրի հանգամանքները մեղադրանքը մեղմացնելու մասին։ Բոլոր նրանք, ովքեր մտածում են Օգանովսկու համար, թող դիմեն դատարան։ Իսկ որ նա հանցագործություն է արել՝ դա փաստ է» ,-եզրափակեց Կարեն Օհանջանյանը։
