Առավոտյան լավ հանդիպում ենք ունեցել նիդերլանդացի գործարարների հետ, որոնք արդեն գործունեություն են ծավալում Հայաստանում, խոսել ենք նոր հնարավորություններ, նոր զարգացումների մասին: Այս մասին Նիդերլանդներում «Առաջին լրատվական»-ի հետ զրույցում նշեց էկոնոմիկայի նախարար Վահան Քերոբյանը:
«Ես օգտվելով առիթից պատմել եմ կառավարության կողմից իրականացվող գյուղատնտեսության տնտեսության արդիականացման ծրագրերի մասին, որտեղ մենք լայն մասշտաբով սուբսիդավորում ենք թե սարքավորումների արդիականացումը, թե ջերմոցների, ինտենսիվ այգիների արդյունավետ կամ բարձր արտադրողական գյուղատնտեսական ծրագրերի իրականացումը: Տեսանք անթաքույց հետաքրքրություն եղած բիզնեսներն ընդլայնելու և նոր բիզնեսներ ստեղծելու համար: Արդեն հաջորդ շաբաթ հոլանդական մեծ բիզնես պատվիրակություն կլինի Երևանում և այնտեղ կկարողանանք ավելի առարկայական քննարկել բիզնես ծրագրերը»,-ասաց նախարարը: Հարցին, թե հիմնականում ո՞ր ոլորտներում են հոլանդացի գործարարներն ուզում ներդրումներ անել, Քերոբյանը պատասխանեց. «Գյուղատնտեսություն, տեղեկատվական տեխնոլոգիաներ, արդյունաբերություն և առևտուր: Սրանք 4 հիմնական ոլորտներն են, որտեղ մենք ունենք բազմաթիվ հնարավորություններ»:
