Հայաստանի մարքսիստական կուսակցության նախագահ Դավիթ Հակոբյանից լրագրողները հետաքրքրվեցին՝ սպասվո՞ւմ են, արդյոք, արտահերթ ընտրություններ, թե՞ ոչ: Դավիթ Հակոբյանը պատասխանեց, որ միջազգային հանրությանն անընդհատ խաբել հնարավոր չէ, և ժամանակն է, որ գոնե երկու շրջան հանձնեն: «Եթե նրանք համաձայնեն հանձնել երկու շրջան, ապա մինչև հունվար մենք կունենանք «արքայական գամբիտ»: Այդ դեպքում, ըստ Դավիթ Հակոբյանի, ելքը կմնա ԱԺ-ն ցրելը, և նոր ընտրություններ անցկացնելը: Դավիթ Հակոբյանը հիշեցրեց, որ 2005 թ. մայիսի 31-ին Արցախյան վիկինգների դինաստիան որոշել է ԼՂ-ն ցամաքային կապով միացնել Հայաստանին, իսկ յոթ շրջանները դնել դիվանագիտական աճուրդի սեղանին: Ըստ Դավիթ Հակոբյանի` յոթ շրջանները հանձնել` նշանակում է հանձնել Խորհրդային Ղարաբաղը: «Այսօր մենք թույլ չենք տա Սան Ստեֆանոյի պայմանագրից հետո երկրորդ Բեռլինի կոնգրես` Արցախյան հիմնահարցով»,- ասաց նա: Լրագրողները հետաքրքրվեցին, թե արդյոք Նիկոլ Փաշինյանը առաջիկա ընտրություններում կկարողանա՞ հանդես գալ որպես լիդեր: Դավիթ Հակոբյանը նշեց, որ կան քաղաքական գործիչներ և կան քաղաքական գործամոլներ: Նա իշխանական ողջ բուրգը բնութագրեց որպես քաղաքական գործամոլներ: Հայաստանի գլխավոր մարքսիստը հիշեցրեց, որ, այս տարվա հունվարի 10-ին, երբ Երևանի թիվ 10 ընտրատարածքում տեղի ունեցան ԱԺ պատգամավորի ընտրություններ, և ինքը մրցում էր Նիկոլ Փաշինյանի հետ, ինքը շատ պասսիվ է պահել իրեն, որպեսզի ամեն ինչ անեն նրան քաղբանտարկյալի կարգավիճակից հանելու համար: Դավիթ Հակոբյանը հիշեցրեց, որ լիդերը ծնվում է բնական ճանապարհով, լինում է բնատուր: Ըստ նրա` լիդեր կարող է լինել նա, ով կարող է տալ նոր տնտեսական քաղաքականության դոկտրինա, նաև՝ առաջարկել Արցախի հիմնահարցի լուծման նոր դոկտրին: Դավիթ Հակոբյանը նշեց նաև, որ ՀՅԴ-ն, «Ժառանգությունը» և «Օրինաց Երկիրը» դասվում են ողորմածիկների շարքում և խփված խաղաքարտեր են: