Գեղարքունիքի մարզի Մարտունի համայնքի Ծակքար գյուղի միջնակարգ դպրոցի թիմը կներկայացնի Գեղարքունիքի մարզը «Հայաստանի Հանրապետության Վարչապետի գավաթ» խճուղավազքի հանրապետական փուլում։
Ինչպես «Արմենպրես»-ին տեղեկացրին Գեղարքունիքի մարզպետարանի ԿՄՍ վարչությունից, 2022 թվականի մայիսի 14-ին Տավուշի մարզի Դիլիջան համայնքի «Պարզ լիճ» տանող ճանապարհի 4 կմ. հատվածում անցկացվելու է «Հայաստանի Հանրապետության Վարչապետի գավաթ» դպրոցականների թիմային խճուղավազք, որտեղ յուրաքանչյուր մարզ խճուղավազքին պետք է ներկայանա իր լավագույն դպրոցական թիմով: «Լավագույն դպրոցական թիմին ընտրելու նպատակով Ծովակ-Լճավան-Ախպրաձոր մարզային նշանակության ավտոճանապարհի Ծովակ-Լճավան 4 կիլոմետրանոց հատվածում կազմակերպվեց եւ անցկացվեց մրցումների մարզային փուլը: Խճուղավազքի մասնակիցների անվտանգությունն ապահովում էին ոստիկանության աշխատակիցները, իսկ առաջին բուժօգնությունը՝ Վարդենիսի բժշկական կենտրոնի շտապ օգնության ծառայության բուժանձնակազմը։ Մրցումները անցկացվում էին թիմային կարգով: Թիմի կազմը բաղկացած էր նույն դպրոցի 7 աշակերտներից, այդ թվում՝ 2 աղջիկ եւ 5 տղա: Մրցապայքարը համարվում էր ավարտված, եթե թիմի բոլոր անդամները հաղթահարում էին 4 կիլոմետրանոց ճանապարհահատվածը, հակառակ դեպքում թիմի արդյունքները զրոյացվում էր:
Մարզային փուլին մասնակցեցին Թթուջուր գյուղի, Մարտունի գյուղի, Սարուխանի N 1, Կարմիրգյուղի N1, Գավառի N 2, Գավառի N 8, Վերին Գետաշենի N 1, Ծակքարի, Վաղաշենի, Փոքր Մասրիկի, Ծովակի, Կարճաղբյուրի, Ակունքի, Մաքենիսի, Լճավանի եւ Ծովագյուղի (հանդես եկավ 2 թիմով) միջնակարգ դպրոցների թիմերը: Ծավալվեց հետաքրքիր եւ համառ պայքար: Բոլոր թիմերը կարողացան ավարտել մրցապայքարը: Մարզային փուլի հաղթող ճանաչվեց Ծակքարի միջնակարգ դպրոցի թիմը, որը «Հայաստանի Հանրապետության Վարչապետի գավաթ» դպրոցականների թիմային խճուղավազքի եզրափակիչ փուլում կներկայացնի ՀՀ Գեղարքունիքի մարզը»,-ներկայացրին Գեղարքունիքի մարզպետարանի ԿՄՍ վարչությունից:
