ՀՀ ԱԻՆ Փրկարար ծառայության Գեղարքունիքի մարզային փրկարարական վարչության ջրափրկարարական ջոկատի անդամները, հրշեջ-փրկարարները եւ մայրաքաղաքից ժամանած մասնագետները շարունակում են որոնողական աշխատանքները Սեւանա լճում՝ 2022 թվականի մայիս 6-ի երեկոյան Սեւանա լճում նավակով անհետացած երկու քաղաքացիներին հայտնաբերելու նպատակով։
Ինչպես տեղեկացրեց ՀՀ ԱԻՆ փրկարար ծառայության Գեղարքունիքի մարզային փրկարարական վարչության պետի տեղակալ Գարիկ Հակոբյանը, փրկարարական աշխատանքներում ներգրավված են 18 հոգի, օգտագործվում է նաեւ ստորջրյա դրոն, սակայն առայժմ որոնումները դրական արդյունք չեն տալիս։ «Որոնողական աշխատանքները սկսել են երեկ երեկոյան, ահազանգը ստանալուն պես։ Եղանակային վատ պայմանների եւ մթության պատճառով ստիպված ենք եղել դադարեցնել որոնումները, որոնք վերսկսել ենք վաղ առավոտվանից եւ շարունակում ենք մինչ այժմ։ Ուժեղ քամին ու ալեկոծությունն առայժմ չեն դադարում՝ խանգարելով փրկարարներին»,-ներկայացրեց Գարիկ Հակոբյանը։
Նախնական տվյալներով՝ որոնվողները Մարտունի համայնքի Վարդենիկ գյուղի բնակիչներ, 1969 թվականին ծնված Ավետիք Սեւոյանն ու 2001 թվականին ծնված Իշխան Աբրոյանն են, ովքեր Մարտունի համայնքի Զոլաքար եւ Վարդենիկ գյուղերի հատվածում նավակով ձկնորսության են դուրս եկել Սեւանա լճի վրա եւ անհետացել 2022 թվականի մայիսի 6-ի ժամը 16-ի սահմաններում։
