Ակնհայտ է, որ Ռուսաստանը ուղիղ մասնակցում է հայաստանյան ներքաղաքական լարումներին: «Առաջին լրատվական»-ի հետ զրույցում նշեց «Հանուն Հանրապետության» կուսակցության նախագահ Արման Բաբաջանյանը` հավելելով, որ լարողները չէին էլ պատկերացնում, որ սա կարող է երկար ձգվել:
Բաբաջանյանի խոսքով` Ռուսաստանը անհարմար վիճակում է հայտնվել. ՀՀ սուբյեկտայնությանը այս պահին պատրաստ չէր. «Անում ենք մի տնային աշխատանք, որին պատրաստվում ենք հետուկրաիանական կոնֆլիկտին: Անվտանգության բարձիկներ ենք դնում մեր պետության հիմքում, որպեսզի պետականությամբ չվճարենք վերափոխումների դիմաց: Բլինքենի վերջին հայտարարությունը ցույց տվեց, որ հավաքական արևմուտքը ուղիղ ազդում է Ադրբեջանի վրա:Ռուսաստանը զրկվել է Ադրբեջանին որևէ բան հրամայելու մենաշնորհից:Այն ջանքը, որ Արևմուտքը գործադրում է` Ադրբեջանն ու Հայաստանը երկխոսեն, մտահոգում է ՌԴ-ին»:
Արցախում իրերի դրության տերը Բաբաջանյանի կարծիքով` Ռուսաստանն է, վերջին թելը Արցախն է, որ մեզ կապում է ռազմավարական դաշնակցի հետ. «Արցախի դրոշը փակցնելը հավասարազոր է Ռուսաստանի դրոշ փակցնելուն: Ընդդիմությունը Արցախի դրոշը փակցնելով Արցախը նկատի չունի: Արցախը այսօր Հայաստանի հետ որևէ քաղաքական և ռազմական կապվածություն չունի:Արցախը վերադարձնելու համար Հայաստանի դրոշը պետք է փակցնել: Ընդդիմությունն իր գործողություններով միացել է ռուս-թուրք-ադրբեջանական ջանքերին` ՀՀ-ն դուրս դնել ԼՂ կարգավորման գործընթացից: Գործ ունենք պետության, Հայաստանի լինելիության դեմ հավաքված տարբեր խմբավորումների քրեաօլիգարխիկ համակարգի հետ»:
Բաբաջանյանի խոսքով` «Շուշիում երգելու» համար պետք է առնվազն գնալ Ստեփանակերտում ապրել ու աշխատել. « «Շուշիում երգելու» ճանապարհը Ֆրանսիայի հրապարակը չէ»:
