Արցախի Հանրապետության նախագահ Արայիկ Հարությունյանը մայիսի 5-ին ընդունել է «Արցախի փրկություն» շարժման մի խումբ անդամների։ Քննարկվել են աշխարհաքաղաքական և տարածաշրջանային զարգացումներն ու Արցախի Հանրապետության վրա դրանց ազդեցությունը, ինչպես նաև երկրի ռազմաքաղաքական իրավիճակը, անվտանգության ապահովման մեխանիզմներն ու սոցիալ-տնտեսական խնդիրները։ Երկրի ղեկավարը լսել է շարժման անդամների մտահոգություններն ու երկրի առջև ծառացած մարտահրավերների հաղթահարմանն ուղղված առաջարկները, պատասխանել նրանց հուզող հարցերին։
Ամիսներ առաջ ձևավորված «Արցախի փրկության» շարժումը բաղկացած է մի քանի նախաձեռնություններից։ Դրա մաս կազմող «Հայրենիքի ձայն» ՀԿ ներկայացուցիչ Վալերի Խաչատրյանը «Առաջին լրատվական»-ի հետ զրույցում նշեց, որ իրենց նախաձեռնության անդամները ևս ներկա են եղել հանդիպմանը․ «Կան մի շարք հարցեր, որոնք այս պահին մեզ հուզում են և հենց այդ հարցերի հետ կապված մեր նախաձեռնության անդամները մոտեցել են առաջին դեմքին՝ պատասխանները լսելու։ Հիմնական խնդիրը դա էր։ Նաև մեր կողմից ներկայացվել են որոշ առաջարկներ։ Մենք ընդհանուր առմամբ գոհ ենք հանդիպումից»,-ընդգծեց նա։
Խաչատրյանն ընդգծեց, որ մտահոգության հիմնական առարկան այս փուլում անվտանգությունն ու Արցախի կարգավիճակն են․ «Իսկ մնացածը ածանցյալ հարցեր են։ Կան սոցիալական արդարության խնդիրներ, գյուղատնտեսական հողերի նպատակային օգտագործման․․ բազամթիվ հարցեր կան պետականաշինության ու ժողովրդի անվտանգության հետ։ Մենք դա շատ կարևորում ենք»։
Մեր զրուցակիցը կարևորեց փաստը, որ երկրի նախագահը հանդիպում է նաև արտախորհրդարանական նախաձեռնությունների հետ․ «Եթե այս խառը վիճակի հետ կապված մտահոգություն կա, ապա պետք է հանդիպել, քննարկել, լուծումներ գտել։ Այս իմաստով Արցախի նախագահի հետ տեղի ունեցած հանդիպումը միանգամայն բնական է»,-եզրափակեց Խաչատրյանը։
«Արցախի փրկության» շարժման ներկայացուցիչ Գագիկ Ավանեսյանը «Առաջին լրատվական»-ի հետ զրույցում նախագահ Հարությունյանի հետ հանդիպումը կառուցողական որակեց։ Ավանեսյանը մասնավորապես նշեց, որ իրենք բարձրացրել են այս պահին արցախահայերին հուզող մի շարք հարցեր․ «Կարևորել ենք ժողովրդի անվտանգության ապահովման հարցերը, որովհետև բնակչությունը շատանում է օրեցօր, պետք է ֆիզիկական անվտանգության երաշիքներ ստեղծվեն։ Բացի այդ՝ քննարկել ենք արցախյան հարցի բանակցային գործընթացը, թե ինչ է կատարվում քաղաքական ասպարեզում»։
Ավանեսյանն ընդգծեց՝ իրենք ունեին քննարկման ենթակա մոտ 10 կետանոց հարցեր, ստացել են բավարար պատասխաններ․ «Որոշ հարցերում կա հետագայում քննարկելու խնդիրներ, նաև պայմանավորվածություններ։ Նշեմ նաև, որ մեկ հանդիպման ընթացքում հնարավոր չէր հարցերի այդքան մեծ ծավալ քննարկել, կհանդիպենք առաջիկայում ևս»։
Մեր զրուցակիցը փոխանցեց նաև, որ հանդիպման ընթացքում անդարարդաձ է եղել նաև Հայաստանում գտնող Հադրութից ու Շուշիից տեղահանվածների աջակցության հարցը․ «Միգուցե Ղարաբաղի չափ աջակցություն չլինի, բայց պետք է անպայման լինի։ Կարող եմ նշել, որ կառուցողական հանդիպում էր։ Հարցեր կան, որոնցծշուրջ մենք տարբեր պլատֆորմների վրա էինք, բայց դա արդեն երկար քննարկման հարց է։ Ընդհանրապես անկեղծ զրույց ենք ունեցել, մեր բոլոր հարցերին պատասխաններ են տրվել»,-եզրափակեց Ավանեսյանը։