«Առաջին լրատվական»-ի զրուցակիցն է Ամերիկայի հայկական համագումարի տարածաշրջանային գրասենյակի տնօրեն Արփի Վարդանյանը։
–Տիկին Վարդանյան, ՀՀ արտգործնախարար Արարատ Միրզոյանի՝ ԱՄՆ կատարած այցի ընթացքում ստորագրվել են փաստաթղթեր՝ ուղղված Հայաստանի էներգետիկ անվտանգությանը և անկախությանը, ժողովրդավարության ամրապնդմանը, արդարադատության ոլորտում մեր համագործակցությանը։ Ի՞նչ դիտարկումներ ունեք այցի հետ կապված, ի՞նչ կտա Հայաստանին այդ ոլորտներում ԱՄՆ-ի հետ համագործակցությունը։
-Որքան ես հասկացել եմ՝ հանդիպումները բավականին լավ են անցել։ Ես շատ կարևոր եմ համարում ստորագրված փաստաթղթերը։ Էներգետիկ անվտանգությունը շատ կարևոր է բոլոր երկրների համար, Հայաստանն էլ այս իմաստով բացառություն չէ։ Արդարադատության, ժողովրդավարության ոլորտներում Միացյալ Նահանգների հետ համագործակցությունը ևս շատ կարևոր է այս փուլում և բացի դրականից Հայաստանին ոչինչ չի տա։ Հայաստանն այդպիսով միայն առաջ կարող է շարժվել՝ զարգացնելով ժողովրդավարությունը։
Դեռ պետք է տեսնենք, թե ինչ քայլեր են հնարավոր առաջիկայում, բայց ես արդեն իսկ կարևոր եմ համարում ԱՄՆ գնալը, տարբեր հանդիպումներ հենց տեղում անցկացնելն ու ուշագրավ քննարկումներ ունենալը։
–Ռուս-ամերիկյան հարաբերությունների լարվածության այս փուլում, հնարավո՞ր է Հայաստանի դիրքորոշումն ԱՄՆ-ում չընկալվի։
-ԱՄՆ-ն չի կարող Հայաստանի վիճակը հաշվի չառնել։Իհարկե այս պահին հարցականի տակ է ԵԱՀԿ Մինսկի խմբի գործունեությունը, լուծումներ առայժմ չենք տեսնում։
–Սակայն տեսանելի է, որ ԱՄՆ-ն կարող է խաղաղության պայմանագրի կնքմանը, նույնիսկ Պետքարտուղար Բլինքենը ողջունեց Հայաստանի կառավարության «համարձակ քայլերն այդ ուղղությամբ»։
-Բնականաբար ԱՄՆ-ն ողջունում է խաղաղությունը, ինչպես նաև այդ ուղղությամբ ԵԱՀԿ ՄԻնսկի խմբի աշխատանքի շարունակությունը։ Բայց թե դա ինչպես պետք է տեղի ունենա՝ դեռևս հայտնի չէ։ Ինչպես գիտեք՝ Մինսկի խմբում երեք պետություն է ներկայացված և մենք նախկինում մշտապես ասում էինք, որ Ղարաբաղը մնում է միակ հարցը, որի շուրջ Ամերիկան և Ռուսաստանը «լեզու են գտնում»։ Բայց հիմա հստակ չէ՝ կկարողանա՞ն այդպես շարունակել նաև առաջիկայում։ Կարծում եմ՝ պետք է շարունակվի, պարզապես դեռ պարզ չէ, թե ինչ ձևով։
–Հայաստանի ներքաղաքական իրավիճակն ինչքանո՞վ կարող է խանգարել Հայաստան-ԱՄՆ հարաբերությունների զարգացմանը։ Մենք տեսնում ենք, որ ամերիկահայ որոշ կազմակերպություններ՝ ելնելով Հայաստանի ներքաղաքական իրավիճակից դժգոհություն են հայտնում նաև արտգործնախարարի Վաշինգտոն կատարած այցից, նրա հանդիպումներից, խոչընդոտում են ԱՄՆ-ում Հայաստանի դեսպանի աշխատանքը։ Ձեր կազմակերպությունն այդ ամենի հետ կապված ի՞նչ վերաբերմունք ունի։
-Մեր կազմակերպություններն իհարկե այդ ամենը տեսնում է։ Լուրերն ու վիդեոները տարածված են, այդ ամենը տեսանելի է։ Կարծում եմ՝ ինչպես ԱՄՆ-ում դա լուրջ չեն ընդունում, այնպես էլ մենք։ ԱՄՆ-ում էլ սպասում են, որ այդ ամնեը կդադարեցվի։ Անկասկած է, որ ԱՄՆ-ն ու Հայաստանը համագործակցության մեծ ներուժ ունեն ու դա չպետք է խոչընդոտվի ոչ ոքի կողմից։
