ԿԺԴՀ-ն նոր միջուկայն փորձարկումներ Է նախապատրաստում՝ առաջինը 2017 թվականից ի վեր: Ապրիլի 29-ին այդ մասին հաղորդել Է Financial Times (FT) թերթը՝ վկայակոչելով Վաշինգտոնի Ռազմավարական եւ միջազգային հետազոտությունների կենտրոնը:
Փունգերիի զինափորձարանի վերջին արբանյակային լուսանկարներն, ինչպես տեղեկացնում Է հրատարակությունը, վկայում են, որ «նախապատրաստությունն ընթանում Է լրիվ թափով»: Զինափորձարանում գրանցվում են նոր շենքերի կառուցման, շինանյութերի տեղափոխման աշխատանքներ, ինչպես նաեւ սարքավորանքի կենտրոնացում հրապարակի անմիջական մերձակայքում: Հետազոտության հեղինակների խոսքով, որոնց գնահատումները բերում Է թերթը, նախապատրաստման տեմպերը թույլ են տալիս ենթադրել, որ փորձարկումները կարող են անցկացվել 2022 թվականի մայիսից մինչեւ սեպտեմբեր: Անցած անգամ հանրապետությունում միջուկային զենքի փորձարկումներ են կատարվել 2017 թվականի սեպտեմբերի 3-ին:
ԿԺԴՀ-ի իշխանությունների պնդմամբ՝ դրանց ընթացքում պայթեցվել Է կոմպակտ ջրածնային (ջերմամիջուկային) լիցք, որը կարելի Է տեղակայել միջմայրցամաքային բալիստիկ հրթիռի վրա: Պայթեցված ռումբի հզորության գնահատումները տարբերվում են. Ճապոնիայի պաշտպանության նախարարության տվյալներով՝ այն կազմել Է 70 կիլոտոննա, իսկ Կորեայի Հանրապետության տվյալներով՝ 100 կիլոտոննա, հաղորդել Է ՏԱՍՍ-ը: