Արցախի Անվտանգության խորհրդի նախկին քարտուղար Սամվել Բաբայանը հայտարարել է, որ հրաժարվում է մասնակցել 44-օրյա պատերազմի հանգամանքները քննող հանձնաժողովի աշխատանքներին: Պատճառները դեռ որ չի բարձրաձայնում, միայն նշում է, որ խաղի կանոնները չեն պահպանվում, ուստի չի ստացվում:
Հիշեցնենք, որ խորհրդարանական ընդդիմությունը ի սկզբանե հայտարարել էր, որ չի մասնակցելու այս հանձնաժողովի աշխատանքներին, իսկ արտախորհրդարանական ուժերից հանձնաժողովի աշխատանքներին ընդգրկվել էին Ղարաբաղի պաշտպանության նախկին նախարար, Ազատական կուսակցության ղեկավար Սամվել Բաբայանը, «Ինքնիշխան Հայաստան» կուսակցության առաջնորդ Դավիթ Սանասարյանը և «Արդար Հայաստան» կուսակցության նախագահ, փաստաբան Նորայր Նորիկյանը։
Արդեն մի քանի նիստ գումարվել է, բայց արտախորհրդարանական ուժերը չգիտեն՝ ինչ իրավական հիմքով են նրանք ներգրավվել այդ աշխատանքներին։
Քննիչ հանձնաժողովի ղեկավար, ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը նշել էր, որ արտախորհրդարանական ուժերի մասնակցությունը 44-օրյա պատերազմի հանգամանքների ուսումնասիրման նպատակով ստեղծված քննիչ հանձնաժողովի աշխատանքներին կարող է միայն իրավական որոշման արդյունքում լինել, բայց այս պահին որևէ արտախորհրդարանական ուժ ներգրավված չէ հանձնաժողովի աշխատանքներին։ Նա նաև նշել էր՝ արտախորհրդարանական այդ ուժերի ցանկությունները թե ինչ իրավական ձևաչափով կարող են լինել իրագործելի, դա կորոշի արդեն պաշտպանության և անվտանգության հանձնաժողովը, որն այս պահից նաև քննիչ հանձնաժողովն է։
«Արդար Հայաստան» կուսակցության ղեկավար Նորայր Նորիկյանը «Առաջին լրատվական»-ի հետ զրույցում անդրադառնալով ստեղծված իրավիճակին, ասաց. «Մեր իրավական կարգավիճակի հարցը պետք է հստակեցվի, ես չեմ մասնակցելու որևէ գործընթացի, որն ապօրինի կարող է լինել կամ իրավական հիմնավորում չունենալ: Պետք է հստակեցնենք, որպեսզի հասկանանք՝ ինչ ենք անում, կամ անո՞ւմ ենք, թե ոչ: Հստակեցման խնդիր կա, մի երկու օրից կհստակեցվի: Ավելին ասեմ, ապրիլի 30-ին արտախորհրդարանական ուժերի ձևաչափով հանդիպում ունենք Նիկոլ Փաշինյանի հետ, այդ հարցը ես ևս մեկ անգամ բարձրացնելու եմ»:
Նույն խնդրի առնչությամբ «Ինքնիշխան Հայաստան» կուսակցության ղեկավար Դավիթ Սանասարյանը մեր հետ զրույցում նշեց, որ քննիչ հանձնաժողովի աշխատանքներին մասնակցելու վերաբերյալ դեռ վերջնական որոշում չունի. «Մի քանի հարց պետք է ճշտեմ, որից հետո հրապարակային կասեմ որոշմանս մասին: Իսկ Սամվել Բաբայանի որոշումը ինձ համար նորություն է եղել»,-ասաց նա:
հարցին, թե ի՞նչ հարցեր կան ճշտելու, արդյոք դա կապված է քննիչ հանձնաժողովում քվեարկելու իրավունքի հետ, Սանասարյանը պատասխանեց. «Քվեարկելու հետ կապված պարզ է որ չենք քվեարկելու, բայց այն, որ հարցեր տալու իրավունք ենք ունենալու, ինչպես նաև տեղեկացված ենք լինելու այնքան, որքան հանձնաժողովի անդամները, դա փաստ է»:
Նա հավելեց, որ դեռ որոշում չի փոխել մասնակցելու վերաբերյալ։
