Շաբաթներ առաջ Երևան քաղաքի ընդհանուր իրավասության դատարանի դատավոր Կարեն Ֆարխոյանը Արցախի նախագահի հատուկ հանձնարարությունների գծով խորհրդական Վահան Բադասյանին մեղավոր ճանաչեց և դատապարտեց 300.000 դրամ տուգանքի։ Հիշեցնենք, որ Վահան Բադասյանին մեղադրանք էր առաջադրվել սահմանադրական կարգը տապալելու և իշխանությունը յուրացնելու կոչեր հնչեցնելու մեջ։ Նախօրեին նրա փաստաբանը բողոք է ներկայացրել Վերաքննիչ քրեական դատարան։
Այս առնչությամբ, ինքը՝ Վահան Բադասյանը «Առաջին լրատվական»-ի հետ զրույցում նշեց. «Ինձ չի հետաքրքրում՝ ինչ են որոշել, ինձ հետաքրքրում է այն, որ ինձ վերագրել են արարք, որը ես չեմ կատարել՝ սահմանադրական կարգի տապալում, իշխանության բռնի զավթում, տարածքային ամբողջականության վրա ազդում և այլն: Նիկոլի հոդվածը, փաստորեն, դրել են ինձ վրա: Այդ ամենը Նիկոլն է արել, բայց ինձ վրա են դրել: Իմ հնչեցրածը եղել է ընդամենը սպառնալիք և պետք է քննարկվեր, թե ինչու եմ ներկայացրել այդ սպառնալիքը: Սպառնալիքը նախատեսում է առավելագույնը 1-3 տարի ազատազրկում, այդ հոդվածը կալանավորման ենթակա չէր: Որպեսզի կարողանային կալանավորել, ինձ վրա ավելի ծանր հոդված են դրել: Եվ քանի որ կալանավորել էին, քննչական մարմիններն ու դատախազությունը պահպանել են կալանավորման ենթակա հոդվածը: Ես երբեք չեմ կատարել այդ արարքը, որն ինձ մեղսագրում են, այդ արարքները պետք է վերագրել Փաշինյանին: Իմ արարքը սպառնալիք է: Վերաքննիչ դատարանից ակնկալիքն այն է, որ հոդվածը փոխեն և ճիշտ հոդվածով թեկուզ առավելագույն պատիժ սահմանեն»:
Բադասյանը հավելեց, որ եթե մեղադրանքի հոդվածը չփոխեն, ինքը բոլոր ատյաններով գնալու է և մինչև Եվրադատական բողոքելու է:
Վահան Բադասյանը հրապարակեց իր նկատմամբ քրեական հետապնդման հետ կապված մի մանրամասն. «Դեռևս կալանավորման որոշման ժամանակ առաջին ատյանի դատարանում ներկայացրել էին մի կեղծ տեղեկանք, որի համաձայն ես իբր մինչև վիրավորում ստանալը պահեստից ստացած F-1 տեսակի 20 նռնակ չեմ վերադարձրել: Նախ արխիվը մնացել է Հադրութում, ես այնտեղից եմ ստացել: Հիմա հարց. որտեղի՞ց իրենց տեղեկություն, որ ես նռնակներ եմ ստացել, երբ իմ ստորագրությունը չկար: Երբ մենք պահանջել ենք հիմքը, իրենք ներկայացրել են, որտեղ ուրիշ ձեռագրով ավելացրած էր 20 հատ նռնակ ու իմ ստորագրությունը չկար: Այսինքն որտեղի՞ց իրենց այդ արխիվը: Ի՞նչ է, իրենք իմացել էին, որ ամիսներ հետո Վահան Բադասյանը պետք է սպառնալիք հնչեցնի և այդ փաստաթուղթը իրենց հետ բերե՞լ էին: Իրենք վիրավորներին էլ են թողել Հադրութի զորամասում: Այսինքն բոլոր փաստաթղթերը թողել էին, այդ մի փաստաթուղթը հանե՞լ էին: Հաջորդը, եղբորս երկու որդիները, որ մասնակցել են պատերազմին, գրել էին, որ իրենց զենքը նույնպես վերադարձված չէ, ինչը բացարձակ սուտ է: Այսինքն տպավորություն էին թողել, որ ես իրոք պատրաստվում եմ գործողության և ունեմ բանդա, որպեսզի դատարանը անմիջապես համաձայներ ինձ կալանավորելուն: Դատարանն այդ փաստաթղթին պատշաճ ուշադրություն չի դարձրել, բայց դա ամբողջությամբ սուտ տեղեկանքներից էր կազմված»:
Անդրադառնալով Ազատության հրապարակում ընդդիմության կազմակերպած ակցիաների, բողոքի երթերին՝ Վահան Բադասյանն ասաց. «Այս պահին կարևոր չէ՝ մենք քննարկենք, թե ով է գալու, որովհետև ով էլ գա, սրանից վատ չի լինելու: Առաջին հերթին այսօր օրակարգում պետք է լինի Նիկոլի հեռացումը: Իսկ թե ով է գալու, նախկինները հաստատ չեն գալու: Ճիշտ կլինի, որ համախմբվենք ամբողջ ազգով և Նիկոլին հեռացնենք: Երբ մենք համախմբված դա անենք, համախմբված ձևով էլ լիդերին գտնելու ենք»:
