Դավիթ Հակոբյանը մամուլի ասուլիսի ժամանակ հայտարարեց, թե «Ընտրական օրենսգիրքը» մեր «աքիլլեսյան գարշապարն է»: Ըստ նրա՝ 1998 թ. փետրվարի չորսին Երկրապահների խունտայի կողմից ձևավորված ընտրական իրավունքը չի կարող ապահովել հասարակության ֆիզիկական անվտանգությունը և զերծ պահել քաղաքական կատակլիզմներից: Այդ ընտրական իրավունքը, ըստ Դավիթ Հակոբյանի, իշխանագողության համար ստեղծված ընտրական իրավունք է: Նրա կարծիքով, այդ ընտրական իրավունքը բացառում է իշխանափոխությունը քաղաքական բոնապարտիզմի, քաղաքական տեռորիզմի, քաղաքական կատակլիզմի, քաղաքական ավանտյուրիզմի պատճառով: «Բնական ճանապարհով սերնդափոխություն ապահովել չի կարող, իսկ ամենավտանգավորն այն է, որ հղի է քաղաքացիական պատերազմով»,- հայտարարեց Դավիթ Հակոբյանը: Ըստ նրա` «Հարությունյան Դավիթը, որին, դժբախտաբար, վստահել են ընտրական իրավունքի կտակարանը, նոր սկզբունք է մշակում իշխանագողությունը կյանքի կոչելու համար»: Դավիթ Հակոբյանը հիշեցրեց, որ ձեռնարկատիրական կապիտալը և պառլամենտարիզմը անհամատեղելի են: Դավիթ Հակոբյանի կարծիքով` բոլոր քաղաքացիները պարտավոր են մասնակցել ընտրություններին, և նրանք, ովքեր չեն մասնակցում ընտրություններին, պետք է վճարեն մեծ չափի տուգանք կամ զրկվեն երկրի քաղաքացիությունից մինչև հաջորդ ընտրությունները: Հայաստանի գլխավոր մարքսիստը հիշեցրեց, որ այդ փորձը կիրառվում է Իտալիայում: Դավիթ Հակոբյանն համարում է, որ հատկապես ՀՀ նախագահի ընտրություններից մեկ տարի առաջ պետական չինովնիկը պետք է լքի պետական մեքենան: Դավիթ Հակոբյանը կանխատեսեց, որ այսօրվա սոցիալական ծանր պայմաններում ժողովուրդը կարող է հրաբխի պես ժայթքել: Իսկ այդ «Ընտրական օրենսգրքով» ընտրություններին մասնակցելը, Դավիթ Հակոբյանի պատկերացմամբ, նշանակում է գնալ նոր քաղաքացիական պատերազմի:
