Հայաստանում լրագրողների ու լրատվամիջոցների գործունեության համար 2022 թվականի առաջին եռամսյակը համեմատաբար հանգիստ ժամանակաշրջան է եղել: Խոսքի ազատության պաշտպանության կոմիտեի առաջին եռամսյակի զեկույցի համաձայն՝ նվազել են լրագրողների նկատմամբ ֆիզիկական բռնության, ԶԼՄ-ների և դրանց աշխատակիցների նկատմամբ ճնշումների, ԶԼՄ-ների, լրագրողների դեմ ներկայացված դատական գործերի թվերը: Մասնավորապես, 2022 թվականի առաջին եռամսյակում կոմիտեն գրանցել է լրագրողների նկատմամբ ֆիզիկիական բռնությունների 1 դեպք: 2021 թվականի նույն ժամանակահատվածում գրանցվել էր 7 դեպք: ԶԼՄ-ների և դրանց աշխատակիցների նկատմամբ ճնշումների դեպքերը 2022 թվականի առաջին եռամսյակում եղել են 12, իսկ 2021 թվականի առաջին եռամսյակում՝ 20: ԶԼՄ-ների և լրագրողների դեմ ներկայացված դատական գործերի թիվն ընթացիկ տարվա առաջին երեք ամիսներին եղել է 7, իսկ 2021-ի նույն ժամանակահատվածում՝ 10: «Արմենպրես»-ի մամուլի սրահում հրավիրված ասուլիսում Խոսքի ազատության պաշտպանության կոմիտեի նախագահ Աշոտ Մելիքյանը նշեց, որ նման ցուցանիշներ ունենալը պայմանավորված է նաև այն հանգամանքով, որ ընթացիկ տարվա առաջին եռամսյակում երկրում ներքաղաքական առումով համեմատաբար հանգիստ է եղել:
«Մենք մեր բազմամյա դիտարկումների ժամանակ տեսել ենք, որ երբ երկրում սրվում է հասարակական, քաղաքական իրավիճակը, ապա ակտիվանում են նաև ընդդեմ լրագրողների ու լրատվամիջոցների ճնշումները: Երբ երկրում հանդարտ մթնոլորտ է, ապա այդ ճնշումները պակասում են»,-ասաց Աշոտ Մելիքյանը: Նրա խոսքով, ցուցանիշներն առաջին եռամսյակում բավական բարելավվել են, սակայն պետք չէ հանգստանալ, ներքին լարվածություն այնուամենայնիվ կա: Աշոտ Մելիքյանն ընդգծեց, որ թե լրագրողները, թե քաղաքական գործիչները, թե իրենց համախոհները ցանկացած տարաձայնություն, ցանկացած գաղափարական պայքար պետք է եզրափակեն հենց այդ հարթակում և թույլ չտան, որ այդ հարաբերություններում գործը հասնի բռնությունների ու փոխադարձ վիրավորանքների:
Ի տարբերություն լրագրողների, ԶԼՄ-ների նկատմամբ բռնությունների ու ճնշումների ցուցանիշների բարելավմանը, ընթացիկ տարվա առաջին եռամսյակում աճել են տեղեկություն ստանալու և տարածելու իրավունքի խախտումների դեպքերը: Մասնավորապես, եթե 2021 թվականի առաջին եռամսյակում գրանցվել էր նման 15 դեպք, ապա 2022 թվականի նույն ժամանակահտվածում՝ 45 դեպք:
«Այս ցուցանիշը վկայում է այն մասին, որ լրագրողները շատ մեծ դժվարությամբ են ստանում պաշտոնական տեղեկատվություն պետական մարմիններից, բողոքները շարունակում են մեզ հասնել: Մեր մտահոգությունը պետք է հայտնենք այս առումով: Շատ ժամանակ նույնիսկ դա կարող պատճառ հանդիսանալ մեր տեղեկատվական դաշտում ապատեղեկատվության տարածման համար» ,-ասաց Աշոտ Մելիքյանը:
Աշոտ Մելիքյանն իր մտահոգությունը հայտնեց նաև օրենսդրական փոփոխությունների առնչությամբ, մասնավորապես, «ծանր վիրավորանք»-ի քրեականացման, զրպարտության և վիրավորանքի համար նախատեսված դրամական փոխհատուցման վերին շեմի եռապատկման մասին: Նրա խոսքով, խոսքի ազատության անհիմն սահմանափակումներ են առաջացնում նաև «Զանգվածային լրատվության մասին» օրենքում կատարված և դեռ շարունակվող փոփոխությունները, հատկապես, կապված պետական մարմիններում լրագրողների աշխատանքի, նրանց հավատարմագրումը մերժելու կամ այն դադարեցնելու հետ: Հայաստանյան մեդիա փորձագետներից շատերն անհրաժեշտ են համարում այս փոփոխությունների անհապաղ վերանայումը և ընդհանրապես, ԶԼՄ-ներին վերաբերող ամբողջ օրենսդրության բարեփոխումը:
