Արցախի ԱԳ նախարար Դավիթ Բաբայանի խոսքով՝ Արցախի հաշվին չի կարող լինել Հայաստանի և Ադրբեջանի միջև հարաբերությունների կարգավորումը: Այո, հայ-ադրբեջանական հարաբերություններն ու ադրբեջանա-ղարաբաղյան հակամարտությունը փոխկապակցված գործընթացներ են:
«Կան գերտերություններ, ովքեր շահագրգռված են, որպեսզի Հայաստանը հարաբերությունները կարգավորի Ադրբեջանի հետ, բայց այդ համատեքստում Արցախը չի կարող ճանաչվել Ադրբեջանի մաս: Արցախն Ադրբեջանի կազմում ընդգրկելու ցանկացած փորձ կբերի արյունահեղության, կհանգեցնի Արցախի կործանմանը, որից հետո Հայաստանի անհետացումը միայն ժամանակի խնդիր կլինի։ Այո, հայ-ադրբեջանական հարաբերություններն ու ադրբեջանա-ղարաբաղյան հակամարտությունը փոխկապակցված գործընթացներ են, բայց, այնուամենայնիվ, դրանք պետք է դիտարկել առանձին, որովհետև առանձին գործընթացներ են: Արցախի հաշվին չի կարող լինել Հայաստանի և Ադրբեջանի միջև հարաբերությունների կարգավորումը: Մենք բազմաթիվ անգամներ հայտնել ենք մեր դիրքորոշումը»,- ԳԱԼԱ-ի հետ զրույցում նման կարծիք հայտնեց Արցախի ԱԳ նախարար Դավիթ Բաբայանը:
Բաբայանն, անդրադառնալով որոշ պաշտոնյաների՝ Արցախի վերաբերյալ հայտարարություններին, ասում է.
«Մենք մտածում ենք, որ իրենց հայտարարություններն ընդամենը իրենց կարծիքն է, և էդ կարծիքը սխալ է: Այդ կարծիքը չի կարող նպաստել և չի կարող բերել Արցախի համար որևէ դրական զարգացման: Նրանք կամ չեն պատկերացնում, թե ինչ են ասում, կամ չեն սիրում Արցախը և այլն: Ես չգիտեմ և չեմ էլ ուզում խորանալ դրդապատճառների մեջ: Ադրբեջանում դուք լսե՞լ եք, որ գեթ մեկ մարդ ասի, որ Արցախը կարող է լինել անկախ կամ Հայաստանի կազմում՝ էն դեպքում, որ իրենք արհեստածին պետություն են, բայց տեսեք, թե ինչ կռիվ են տալիս ամեն 1 մմ հողի համար, երբ իրենց հողն էլ չէ»,- հայտարարեց Դավիթ Բաբայանը:
Արցախի ԱԳ նախարարը, անդրադառնալով Հայաստանի վարչապետ Նիկոլ Փաշինյանի մոսկովյան պաշտոնական այցի շրջանակում ձեռք բերված պայմանավորվածություններին, հայտարարեց.
«Շատ կարևոր է հայ-ռուսական եղբայրական հարաբերությունների զարգացումը և խորացումը, որովհետև ինչքան ամուր են այդ հարաբերությունները, այդքան հուսալի է մեր անվտանգության համակարգը և ապահով են լինելու Հայաստանն ու Արցախը: Որքան ամուր լինեն հայ-ռուսական եղբայրական հարաբերությունները, այնքան հուսալի կլինի և՛ Հայաստանի, և՛ Արցախի ապագան, այնքան ավելի ամուր կլինեն Ռուսաստանի դիրքերը։ Այս տեսանկյունից Ռուսաստանի և Հայաստանի միջև օրերս ձեռք բերված պայմանավորվածությունները կարևոր ենք համարում: Ռուսաստանը կարևոր դերակատարություն ունի ադրբեջանա-ղարաբաղյան հակամարտության գոտում: Մեզ համար հիմա կարևորն այն է, որ փրկենք Արցախը՝ կարևորելով բանակցային գործընթացները»,- եզրափակեց Արցախի ԱԳ նախարար Դավիթ Բաբայանը:
