Պետությունն էշի ականջում քնած է, իր համար հարմարվել է, ապրում է, և գնում է ուրացման, մեր ապագայի անեացման ուղղությամբ, ինչն ինձ համար նընդունելի է: Այս մասին «Առաջին լրատվական»-ի հետ զրույցում նշեց երաժիշտ, երգահան, Ազգային ժողովրդավարական բևեռի համակիր Եղիշե Պետրոսյանը:
«Որբի կարգավիճակով հասել ենք այսօրվա և ցավոք սրտի, այս փսևդոանկախության 30 տարում էլ ոչինչ չարվեց ազգին միավորելու, ուղղորդելու, նրա արժեհամակարգը ամրապնդելու, դիրքը հաստատելու ուղղությամբ: Մենք մինչև էսօր ալեկոծ ծովում ծակ նավակով նավարկում ենք»,-ասաց նա:
Անդրադառնալով հայ-թուրքական հարաբերությունների կարգավորման գործընթացին, Եղիշե Պետրոսյանն ասաց. «Ես երկուս եմ նշանակում այդ դիվանագիտությանը,այդ մտածելակերպին, այդ հոգեբանությանը: Սա ոչ թե հարաբերությունների կարգավորման խնդիր է, այլ ռուս-թուրք-ադրբեջանական տանդեմի կողմից պարտադրված կապիտուլյացիայի հաստատումն է, Ցեղասպանության ուրացումն է: Ինչքան էլ ասեն՝ նախապայմաններ չկան, մենք հո լավ գիտենք՝ նա ինչ է մտածում: Պարտադիր է ասի՞: Ես մեղադրում եմ մերոնց: Մենք պետք է հետամուտ լինենք մեր օկուպացված հայրենիքի արդարացի վերադարձին: Դա երկար տարիների աշխատանք է պահանջում, բայց այդ նպատակը պետք է ունենալ և քայլ առ քայլ գնալ դեպի այդ նպատակը»:
Նա ընդգծեց, որ այս իշխանությունը որդեգրել է «խաղաղություն ուրացման դիմաց» բանաձևը:
Հարցին, թե հնարավո՞ր է համագործակցություն Ազատության հրապարակում ակցիաներ կազմակերպող խորհրդարանական ընդդիմությանը, որոնք իշխանափոխության խնդիր են դնում, Եղիշե Պետրոսյանն արձագանքեց. «Մենք էլ ենք դնում իշխանափոխության խնդիր, բայց ոչ թե նրանց գալու հաշվին, նրանք տեղ չունեն: Նրանք իրենց սև գործը մեր պետության հետ արել են, նրանք դեռ չեն ապաշխարել, պատասխանատվության չեն ենթարկվել: Այնպես որ «ընդդիմություն» բառը նրանց չի սազում, նրանք մատնոց ֆռռացնողի հերթական մատնոցն են, և իշխանության տարբեր ածանցյալները: Երբ ազգային ուժերը հանկարծ գլուխ են բարձրացնում, նրանք միանգամից իջեցվում են հրապարակ որպես դեսանտ և սկսում են օդը պղտորել: Իրենց խնդիրը դա է»: