Ազգային անվտանգության ծառայությունն Իրավական ակտերի նախագծերի հրապարակման միասնական կայքում օրերս ներկայացրել է «Հատուկ պետական պաշտպանության ենթակա անձանց անվտանգության ապահովման մասին» օրենքում փոփոխություններ կատարելու նախագիծը, որով առաջարկում է պետական պահպանության ծառայությունն առանձնացնել ԱԱԾ-ից։
«Կարևորելով զինծառայողներով համալրված և «այլ զորքերի» կարգավիճակով օժտված մարմնի գործառույթների օպերատիվ կառավարման անհրաժեշտությունը, ինչպես նաև նկատի ունենալով այն, որ պետական պահպանության ծառայության պարագայում ծառայությունը պայմանավորված է ամենօրյա ռեժիմով իրավիճակին արագ արձագանքելու և համարժեք գործողություններ իրականացնելու հրամայականով՝ նախատեսվում է վերջինիս ներառել վարչապետին ենթակա մարմինների շարքում»,- ասված է նախագծի հիմնավորման մեջ։
Օրենքի փոփոխությամբ նախատեսվում է, բացի նախագահից ու վարչապետից, անձնական բժիշկ տրամադրել նաև Ազգային ժողովի նախագահին․ «Անհասկանալի տրամաբանությամբ՝ նման երաշխիք (անձնական բժշկի – խմբ․) նախատեսված չէ Ազգային ժողովի նախագահի համար, առաջարկվում է ընդլայնել նշված երաշխիքի ծավալը և այն տարածել նաև ԱԺ նախագահի վրա»,- ասված է հիմնավորման մեջ։
Առաջարկվում է նաև նման երաշխիքներ տրամադրել նաև նշված պաշտոնատար անձանց և նրանց ընտանիքների անդամների անդամներին՝ ամուսնուն, զավակին, ծնողին։ Վերջիններիս դեպքում ապահովվում է ՀՀ-ում գործող բժշկական կազմակերպություններում բժշկական օգնությունն ու սպասարկումը՝ պետական բյուջեի միջոցների հաշվին։ «Հիշյալ երաշխիքի ընդլայնումը պայմանավորված է վերոնշյալ պաշտոնատար անձանց ունեցած առանձնահատուկ դերակատարմամբ պետական իշխանության համակարգում, ինչպես նաև նրանով, որ ներկայումս հենց այդ պաշտոնատար անձինք են օրենքի ուժով օգտվում պետական պահպանությունից, իսկ առողջության պահպանումը որոշակիորեն փոխկապակցված է նաև անվտանգության հետ»,- նշում են նախագծի հեղինակները։
Ուշագրավ է նաև, որ նմանաբնույթ փոփոխություններով փաթեթ շրջանառության մեջ էր դրվել նախորդ տարի, սակայն այն այդպես էլ կառավարության կամ խորհրդարանի օրակարգ չմտավ։
ՀՔԱ Վանաձորի գրասենյակի ղեկավար, իրավապաշտպան Արթուր Սաքունցը կարծում է, որ անձնական բժշկի գաղափարը գուցե մտցվում է անվտանգային նկատառումներից ելնելով․«Իհարկե այստեղ հետաքրքիր է՝ այդ բժիշկն այլ պացիենտներով չի՞ զբաղվելու, միայն պաշտոնյան է լինելու իր պացիենտը։ Կարող է անձնական բժիշկ լինել, անձնական տվյալների գաղտնիության պայմաններով, բայց զբաղվի իր գործունեությամբ։ Գուցե այլ պացիենտներով զբաղվելու հնարավորությունը սահմանափակվի՞ այն իմաստով, որ պացիենտին օգնություն տրամադրելու պահին անհրաժեշտ լինի սպասարկել ԱԺ նախագահին ու դա դժվարացնի համատեղումը։ Բոլոր դեպքերում այստեղ ողջամտություն կա»,-«Առաջին լրատվական»-ի հետ զրույցում ասաց նա։
Ինչ վերաբերում է պետական պահպանության ծառայությանը անմիջապես վարչապետի վերահսկողության տակ դնելուն, ապա, ըստ մեր զրուցակցի, պետք է հասկանալ՝ արդյոք այն դառնում է առանձին կառույց, ունենում իր պետը և բացի այդ՝ դա վերաբերում է միայն վարչապետի՞ն, թե նաև ԱԺ նախագահին․«Այսինքն՝ վարչապետի ենթակայության տակ գտնվող պետական պահպանության ծառայողները նաև ապահովում են Ազգային ժողովի կամ այլ պաշտոնատար անձանց անվտանգությունը՞ Սա էլ առանձին հարց է։ Բոլոր դեպքերում՝ ես պետք է ենթադրեմ, որ կամ Ազգային Անվտանգությունից առանձնացնելը ենթադրում է որոշակի հարցեր՝ զուտ ազգային անվտանգության ծառայության հանդեպ՝ վստահության տեսակետից կամ էլ պետք է նայել այլ երկրների պրակտիկան։ Օրինակ՝ Միացյալ Նահանգների Անվտանգության աշխատակիցները արդյոք առանձին կառույց են հանդիսանում, թե՞ անվտանգության մարմինների կազմում են գտնվում»։
Բոլոր դեպքերում, Սաքունցի խոսքերով, նրանք առանձին ծառայություն են․«Եվ օրինակ մեր նախկին նախագահները, նրանց ընտանիքի անվտանգության ապահովողները՝ որտե՞ղ են գտնվելու, էլի վարչապետին ենթակա կառույցու՞մ, թե՞ մնալու են Ազգային Անվտանգության ծառայության ներքո։ Սրանք հարցեր են, որոնք պետք է պարզաբանումներ ստանան»։
Արթուր Սաքունցը կիսում է մեր այն տեսակետը, թե գուցե կա նաև անվստահության խնդիր․ «Ես էլ չէի վստահի, որովհետև այդ կառույցը չբարեփոխված է, քաղաքական նպատակահարմարության մոտեցում կարող է ցույց տալ և այդ ավանդույթը կառույցի ներսում հաղթահարված չէ։ Այդ առումով խնդիրներն ավելի շատ հենց կառույցի մեջ է, բայց առանձնացնելով արդյոք լուծվում է բուն Ազգային անվտանգության բարեփոխման խնդիրը։ Ես գտնում եմ՝ ոչ։ Հերթական հատային մոտեցման դրսևորման հետ գործ ունենք»։
