Թուրքիայի նախագահ Էրդողանը հայտարարել է, որ ուկրաինական պատերազմը ցույց տվեց, թե որքան կարևոր երկիր է Թուրքիան ՆԱՏՕ-ի համար, և որ Թուրքիայի համար շարունակում է ռազմավարական նպատակ մնալ Եվրամիության անդամակցումը: Էրդողանը հույս է հայտնել, որ Եվրամիությունը համարժեք մոտեցում կցուցաբերի այդ նպատակին: Էրդողանը փորձում է «նոր շնչառություն» տալ Եվրամիությանը Թուրքիայի անդամակցության թեմային, թերևս ավելի շուտ ոչ թե անդամակցելու, այլ Եվրամիության հանդեպ յուրօրինակ ճնշում բանեցնելու համար:
Բանն այն է, որ Եվրամիությունն ընդդիմանալու է Թուրքիայի անդամակցությանը: Նվազագույնը Ֆրանսիան որևէ կերպ չի պատկերացնում այդ կառույցում Անկարայի ներկայությունը: ԵՄ անդամ Թուրքիան նշանակելու է Ֆրանսիայի եվրոպական, ըստ այդմ նաև համաշխարհային կշռի էական նվազեցում, մի շարք գործոնների բերումով: Էրդողանն իհարկե լավ է պատկերացնում իր խոսքերի հնարավոր արձագանքը, պարզապես բացում է Եվրամիության հանդեպ այսպես ասած «դիտողությունների» թեմա, ձգտելով այդպիսով հետաքրքրել նաև ԱՄՆ-ին, եթե իհարկե Թուրքիայի նախագահի ելույթը ԱՄՆ հետ համատեղ հետաքրքրության արդեն իսկ որոշակի դրսևորում չէ: Գաղտնիք չէ, որ ԱՄՆ համար էլ ԵՄ-ին Թուրքիայի անդամակցության հարցը խաղաքարտ է հենց Եվրոպայի դեմ: Ահա այդ ֆոնին Եվրոպայի Խորհրդի նախագահ Միշելը փորձում է աշխուժանալ Կովկասում, ինչն ըստ ամենայնի դիտարկվում է գուցե և այդ թվում Թուրքիայի՝ Եվրամիության ուղղությամբ աշխուժանալու հանգամանքին հակակշիռ:
Այդ առումով, Միշելի կովկասյան, մասնավորապես արցախյան, հայ-ադրբեջանական հակամարտության ուղղությամբ դիվանագիտական աշխուժացումը պետք է դիտարկել թերևս ոչ այնքան ինչ որ լուծման հասնելու, որքան Թուրքիայի հետ «մրցակցության» տրամաբանությամբ գործընթաց ապահովելու համատեքստում: Այլ կերպ ասած, Թուրքիան փորձում է աշխուժացնել իր խաղը եվրոպական ռեգիոնի ուղղությամբ, իսկ Եվրամիությունը ի պատասխան փորձում է աշխուժանալ այն ռեգիոնում, որտեղ Թոււրքիան է հավակնում առանցքային դերակատարության: Այդ «մրցակցությունը» կավարտվի ռուս-թուրքակա՞ն, թե՞ թուրք-եվրոպական որևէ համաձայնությամբ: Հայաստանը պետք է դիտարկի թե մեկի, թե մյուսի հնարավոր սցենարներն ու դրսևորումները, դրանց պատրաստ լինելու և համաձայնության օբյեկտի չդառնալու համար: