Եվրոպական արժույթը անկում է ապրում, և դա կարող է բացասաբար ազդել ԱՄՆ-ի տնտեսության վրա, կարծում է ԱՄՆ Դաշնային պահուստային համակարգի (ԴՊՀ) նախկին ղեկավար Ալան Գրինսպենը, հայտնում է Финмаркет-ը:
«Եվրոն անկում է ապրում, և այդ գործընթացը զգալի դժվարություններ է առաջացնում եվրոպական բանկային համակարգում»,- մեջբերում է գործակալությունը Գրինսպենին:
Եվրոյով առաջադրված պարտատոմսերի հանդեպ վստահության անբավարարությունը եվրոպական բանկերը լարվածության մեջ է պահում, շեշտում է Գրինսպենը: «Այդ արժեթղթերը միշտ համարվել են վարկերի ապահովման կատարյալ միջոց, իսկ հիմա կասկածի տակ են առնվում»,- ասել է նա:
Ա. Գրինսպենի կարծիքով՝ Եվրոպայի տնտեսական անկումը բացասաբար կազդի ԱՄՆ ընկերությունների եկամուտների և բաժնետոմսերի գների վրա, քանի որ եվրոպական շուկային է բաժին ընկնում ամերիկյան արտահանման մոտ 20%-ը:
Ինչպես նշել է ԴՊՀ-ի նախկին ղեկավարը, մեծանում է պառակտումը տնտեսական, վիճակագրական և բանկային շրջանակներում: Հարցն այն է, թե արդյո՞ք պետք է, որ եվրոն լինի միասնական արժույթ 17 երկրների համար, որոնք ունեն «տարբեր մշակույթներ»` կապված կառավարությունների, սպառողական ծախսերի և ինֆլյացիայի հետ: Պատասխանելով հարցին, թե արդյո՞ք հնարավոր է եվրոգոտու փլուզում` նա պատասխանել է՝ ակնհայտ է: