Արցախի խորհրդարանը արտահերթ նիստի արդյունքում ընդունել է հայտարարություն, որը վերաբերում է Հայաստանի խորհրդարանում վարչապետ Փաշինյանի ունեցած հայտնի ելույթին և մասնավորապես Արցախի կարգավիճակի վերաբերյալ միջազգային հանրության դիրքորոշումների բարձրաձայնմանը: Ընդ որում, հարկ է նկատել, որ վարչապետ Փաշինյանը ոչ թե արտահայտել է կարգավիճակի վերաբերյալ Հայաստանի դիրքորոշումը, այլ Հայաստանի խորհրդարանում բարձրաձայնել է միջազգային հանրության դիրքորոշումը և ակնկալիքը կամ հորդորը: Թեմայի շուրջ «Առաջին լրատվական»-ը զրուցել է Արցախի Հանրապետության Աժ պատգամավոր, արտաքին հարաբերությունների մշտական հանձնաժողովի անդամ Արամայիս Աղաբեկյանի հետ:
Պատգամավորի խոսքով` Արցախի ԱԺ հայտարարությունը ուղերձ էր արցախահայության անունից. «Արցախը հստակ իր կարմիր գծերը գծել է, մնացածը եզրակացություններ են: Արցախի ինքնորոշման իրավունքի իրացումը պսակվելու է հաջողությամբ»:
