2022թ-ի հոկտեմբերի 13-22-ը Հայաստանում մարդահամար կանցկացվի: Օրերս փոխվարչապետ Համբարձում Մաթևոսյանի գլխավորությամբ քննարկվել է նախապատրաստման և անցկացման աշխատանքների ընթացքը: Անկախությունից հետո առաջին անգամ 2001 թվականին է մարդահամար անցկացվել՝ ավանդական մեթոդով, հետո 2011-ին։ Սա երրորդ մարդահամարն է, որ պետք է լինի անկախությունից հետո։ Հնգօրյա ժամկետում Հանձնաժողովի անդամների կողմից կարծիքներն ու առաջարկները ստանալուց, հարցաշարը լրամշակելուց հետո նախագիծը կներկայացվի կառավարության հաստատմանը, որպեսզի հաջորդ փուլով Վիճակագրության պետական խորհրդի որոշմամբ հաստատվի մարդահամարի հարցաթերթը: Թեմայի շուրջ «Առաջին լրատվական»-ը զրուցել է Վիճակագրական կոմիտեի մարդահամարի և ժողովրդագրության բաժնի պետ Կարինե Կույումջյանի հետ:
Վերջինս մեզ հետ զրույցում նշեց ներկայումս մարդահամար իրականացնելու մեթոդներն ավելի արդիականացվել են. «100 տոկոսով օգտագործել ենք բնակչության ռեգիստրի տվյալները և իրականացվելու է 25 տոկոս հասցեների ընտրանքով հետազոտություն՝ ամբողջական մարդահամարի ծրագրով նախատեսված հարցերի պատասխանները ստանալու համար: Ռեգիստրի տվյալները այն հիմնական ցուցանիշներն են, որոնք կան անձի սեռի, տարիքի, քաղաքացիության, ազգության ծննդավայրի, կացության կարգավիճակի վերաբերյալ: Նրա փոխանցմամբ՝ այժմ ՀՀ բնակչությունը 2 մլն 961 հազար է․ մարդահամարի նոր տվյալները կհրապարակվեն 2023-ի տարեվերջին:
