2013 թվականին Թուրքիայի հիմնադրամների գլխավոր վարչությունը չեղարկել էր փոքրամասնությունների հիմնադրամներում ընտրությունների անցկացման գործող կանոնակարգը, և դա հիմնավորել էր նոր, ավելի բարեփոխված կանոնակարգ կազմելու անհրաժեշտությամբ:
Այդ ժամանակվանից սկսած պոլսահայ համայնքը չի կարողանում իր հիմնադրամներում գործադիր մարմինների պարբերական ընտրություններ անցկացնել պետության կողմից հաստատված կանոնակարգի բացակայության պատճառով: Սա մեծացել է անհանգստությունը համայնքի անդամների շրջանում:
Բանն այն է, որ Թուրքիայում ակտիվանում են խոսակցություններն այն մասին, որ նոր կարգավորմամբ համայնքին պատկանող Սուրբ Փրկիչ հայկական հիվանդանոցի հիմնադրամում գործադիր խորհրդի ընտրություններ չեն անցկացվելու կամ էլ դրանք հետաձգվելու են: Նույն խոսակցությունները կան նաև հունական հիվանդանոցի վերաբերյալ:
Համայնքին պատկանող ամենամեծ կառույցներից մեկի՝ Սբ Փրկիչ հիվանդանոցի հիմնադրամում ընտրությունների հնարավոր բացառման մասին լուրերը մեծ անհանգստություն են առաջացրել համայնքային գործիչների շրջանում: Վերջիններս նախաձեռնել են առցանց ստորագրահավաք՝ ընդդեմ այնպիսի կանոնակարգի հրապարակման, որը կարող է հիշյալ հիմնադրամը դուրս դնել ընտրական գործընթացից: Ստորագրահավաքին այս պահին միացել են ավելի քան 250 համայնքային գործիչներ:
Այս առնչությամբ պոլսահայ քաղաքական գործիչ Գայուշ Չալըքման-Գավրիլոֆն «Առաջին լրատվական»-ի հետ զրույցում նշեց, որ Սուրբ Փրկիչ հիվանդանոցի հոգաբարձուների խորհրդի նախագահ Պետրոս Շիրինօղլուն ուզում է գաղտնի, առանց քվեարկության գնալու ընտրություն անել տալ, այսինքն նշանակվի, ոչ թե ընտրություն լինի, ինքը ցմահ այդտեղ նստի:
«Այդ ստորագրահավաքը մենք ենք կազմակերպել՝ ի հակառակ իրեն: Այս մարդը տևական ժամանակ գաղտնի ձևով իրենց հետ շփման մեջ է: Մեր ուզածն այն է, որ ամեն ինչ պարզ լինի և ընտրություն լինի, ժողովուրդը քվե տա:
Մինչև հիմա մեր բոլոր հիմնարկները, թաղային եկեղեցիները ամեն ինչ ընտրություններով էին անում, իրենց հոգաբարձու, խնամակալ կազմը կամ վարչությունն էին ընտրում: 2-4 տարին մեկ լինում էին ընտրություններ: Թաղային եկեղեցիները, թաղային դպրոցները այդ թաղի բնակիչների քվեով էին ընտրվում, իսկ 5 մեծ հաստատությունները, որոնց թվում է Սուրբ Փրկիչ հիվանդանոցը, կենտրոնական վարժարանը, ամբողջ համայնքի քվեարկությամբ էին ընտրվում: Հիմա այս կանոն են ուզում փոխել, որ ինքն առանց ընտրության այդտեղ մնա: Սա անընդունելի է: Դու սուլթա՞ն ես, բռնապե՞տ ես, ո՞վ ես, որ հավերժ պետք է մնաս»,-ասաց նա:
Գայուշ Չալըքման-Գավրիլոֆի խոսքով, Շիրինօղլին ուզում է հավերժ լինի, որովհետև հիվանդանոցն իր համար մեծ պրեստիժ է. «Ինքը կարծում է, որ հիվանդանոցի ղեկավարը լինելով նաև համայնքի ղեկավարը կլինի: Իսկապես հիվանդանոցի գյուխ լինելը իր համար գագաթնակետ է, բայց դա միայն չակերտյալ, որովհետև ինձ համար ո՞վ է ինքը: Եթե նա հիվանդանոցի ատենապետի իր դիրքը կորցնի, այլևս ոչինչ չի ունենա: Հիվանդանոցի ատենապետը լինելու պրեստիժը, ուժը նաև իր անձնականի համար է օգտագործում: Մենակ Շիրինօղլուն չէ, ով էլ գա, եթե մի քիչ բնավորությամբ թույլ լինի, անմիջապես կշեղվի ճանապարհից: Դրա համար ուժեղ բնավորություն պետք է ունենաս, իսկ Շիրինօղլու-միրինօղլու, նրանք այդպիսի մարդիկ չեն»,-ասաց նա:
