Ամերիաբանկն ամփոփեց VISA վճարային համակարգի հետ անցկացվող «Դարձիˊր փոփոխությունը» ուսանողական մրցույթի արդյունքները: 2021թ. դեկտեմբերին մեկնարկած մրցույթի շրջանակում ուսանողական թիմերը պետք է ներկայացնեին նորարարական գաղափարներ, որոնք կարող են փոփոխություն բերել մարդու/հասարակության որևէ խմբի կյանքում, գիտության կամ տնտեսության ոլորտում: Իսկ մրցույթին մասնակցելու առանցքային պայմաններից մեկն այն էր, որ ներկայացվող նախագիծն իրագործվի Հայաստանում 1-ից 2 տարվա ընթացքում: Մրցույթին ներկայացված նախագծերն ուսումնասիրել և գնահատել են տարբեր ոլորտներ ներկայացնող մասնագետներ:
«Ամերիա» կառավարման խորհրդատվական ծառայության ղեկավար, ժյուրիի անդամ Տիգրան Ջրբաշյանը, ամփոփելով մրցույթի արդյունքները շեշտեց և ուրախությամբ փաստեց, որ երիտասարդությունը ուզում է և ձգտում է փոփոխությունների: «Կարծում եմ այդ փոփոխությունները լինելու են մեր ազգի, մեր վերածննդի և տրանսֆորմացիայի սիմվոլներից մեկը: Կրթությունը պետք է լինի մրցունակ, հակառակ դեպքում կկորցնենք երիտասարդությանը: Այս սերունդն իրականում ունի կրթության որակի, մակարդակի խնդիր, բայց միաժամանակ շատ ավելի բաց է և պատրաստ է նայել դեպի առաջ: Այսպիսի ներդրումները, որոնք ուղղված են երիտասարդության կրեատիվ միտքը զարգացնելուն, փոփոխություններին, շատ կարևոր են մեր ապագայի համար»,-հավելեց նա:
Մրցույթի արդյունքներով հաղթող ճանաչվեց «TakeAR» նախագիծը, որն արժանացավ գլխավոր մրցանակին` 3 մլն ՀՀ դրամ: Հաղթող թիմի անդամները նախատեսում են լրացված իրականության տեխնոլոգիայի միջոցով 9 ամսվա ընթացքում ստեղծել 8-րդ դասարանի կենսաբանության դասագրքի վիրտուալ լաբորատորիա` բջջային հավելվածի ձևով, որը կներառի 3D մոդելներ, 3D անիմացիաներ, թեմայի հակիրճ ձայնագրություն:
Մրցույցթին մասնակցած հինգ թիմեր ստացան խրախուսական մրցանակներ` 100,000-ական ՀՀ դրամի չափով:
Նշենք, որ Ամերիաբանկը, կարևորելով երիտասարդների ներուժը, գաղափարներն ու զարգացումը, մշտապես հնարավորություն է տալիս հանդես գալու նորարար, արդյունավետ գաղափարներով:
Առավել մանրամասն՝ տեսանյութում: