Կորոնավիրուսի համավարակը հեռու է ավարտվելուց, ուստի հիմա զգոնությունը կորցնելու ժամանակը չէ: Նման եզրահանգման է եկել Առողջապահության համաշխարհային կազմակերպության՝ կորոնավիրուսի հետ կապված հարցերով արտակարգ հանձնաժողովը:
«Վիրուսը մինչև հիմա շարունակում է ակտիվ մնալ, մահացության մակարդակը բարձր է, ինքը՝ վիրուսը, զարգանում է անկանխատեսելի ձևով: Հանձնաժողովը միաձայն որոշել է, որ դեռ ժամանակը չէ զգոնությունը թուլացնելու համար»,- ասել է հանձնաժողովի նախագահ Դիդյե Ուսսենը:
ԱՀԿ գլխավոր տնօրեն Թեդրոս Գեբրեյեսուսը հայտարարել է, որ նախորդ շաբաթ գրանցվել է կորոնավիրուսից մահացության ամենափոքր թիվը՝ համավարակի մեկնարկից ի վեր: Միևնույն ժամանակ նա հայտարարել է, որ որոշ երկրներում կա հիվանդության լուրջ բռնկում, ինչը ճնշում է գործադրում հիվանդանոցների աշխատանքների վրա:
