«Առաջին լրատվական»-ի զրուցակիցն է Արցախի ԱԺ Պաշտպանության , անվտանգության և օրինապահության հարցերով մշտական հանձնաժողովի նախագահ Սեյրան Հայրապետյանը։
-Պարոն Հայրապետյան, տեղյակ եք, որ Հայաստանի ընդդիմադիր ուժերը մի քանի օր է տարբեր մարզերում Արցախի դրոշն են տեղադրում, նույնը արեցին նաև խորհրդարանում, բոյկոտեցին նիստը՝ հայտարարելով, թե գալիս են Արցախ։ Ի՞նչ դիտարկումներ ունեք այս ակցիաների մասին, որքանո՞վ են դրանք բխում Արցախի անվտանգությունից։
-Արցախի անվտանգության վերաբերյալ մեր կարծիքը ներկայացնելու ենք խորհրդարանական լսումների ժամանակ։
Ինչ վերաբերում է Արցախի դրոշի հետ կապված ակցիաներին, ապա ով սիրում ու հարգում է Արցախ ի համար՝ շատ շնորհակալ ենք, ով էլ սրտանց չի անում՝ կհորդորենք սրտանց դա անի։ Ես իշխանություն-ընդդիմություն առճակատման մեջ մտնել չեմ ցանկանում։
Իսկ թե ով է Արցախի դրոշն ավելի բարձր պահում, ապա ըստ իս, այսօր ավելի բարձր դա պահում արցախում ապրող 8 տարեկան Բեգլարյան Նելսոնը, ով իր հորը 14 օր չէր տեսել, իսկ այսօր հենց մեր թաղամասում վազեց ու գրկախառնվեց հորը։ Ընդամենը այդքանը կարող եմ ասել ու կցանկանամ բոլորն էլ իմանան՝ Արցախում ապրել ու արարելով են ավելի բարձր պահում Արցախի դրոշը։
-Դուք տեղի ունեցողը ընդդիմություն-իշխանություն առճակատման մե՞ջ եք դիտարկում։
-Ես այդ խաղերի ու հարցերի մեջ մտնել չեմ ցանկանում, մենք ավելի լուրջ խնդիրներ ունենք։
-Ձեր խմբակցությունը Հայաստանի ընդդիմադիրների հետ հանդիպում նախատեսու՞մ է։
Մենք պատրաստ ենք լսել բոլոր կառուցողական առաջարկները, որ ներկայացնում են թե՛ խորհրդարանական և թե՛ արտախորհրդարանական ուժերը։ Պատրաստ ենք հանդիպման, մեր խմբակցության էջում էլ տեղադրել ենք, որ հստակ օրակարգերով Արցախ ժամանած ուժերին պատրաստ ենք ընդունել։ Նաև արտախորհրդարանականների հետ ենք պատրաստ հանդիպել՝ հստակ օրակարգի դեպքում։ Մեր պատրաստակամությունը միանշանակ կա։
-Կարծում եք՝ նման պառակտվածությունը թշնամուն չի՞ ոգևորում, այսինքն օգնելու փոխարեն գուցե խանգարու՞մ են նման միջոացռումները։
-Կարող եմ ասել միայն, որ ինչքան ավելի համախմբված լինենք, այնքան ավելի վատ թշնամու համար։
