ԱՄՆ ու Հնդկաստանը կոչ են արել անհապաղ դադարեցնել Ուկրաինայում մարտական գործողությունները: Այդ կոչը հնչել է ԱՄՆ ու Հնդկաստանի արտաքին գործերի և պաշտպանության նախարարների մակարդակով: «2+2» ձևաչափի քննարկումները տեղի են ունեցել ապրիլի 11-ին Վաշինգտոնում: Գրեթե զուգահեռ տեղի է ունեցել ԱՄՆ նախագահ Բայդենի տեսաձևաչափով հանդիպումը Հնդկաստանի վարչապետ Մոդիի հետ: Ավելի վաղ, սպիտակ տան խոսնակ Պսակին հայտնել էր, թե ԱՄՆ նախագահը կփորձի ճնշում բանեցնել Հնդկաստանի վրա՝ Ռուսաստանին ուկրաինական ռազմարշավի հանդեպ Հնդկաստանի կոշտ դիրքորոշման հասնելու համար:
Ամերիկա-հնդկական հանդիպումների ընթացքում իհարկե չի եղել ճնշման մասին խոսակցություն, սակայն կարծես թե ակնառու է, որ Պեկինի դիրքորոշումը փոխելու թերևս անհաջող փորձից հետո Վաշինգտոնը փորձում է նույնն անել Դելիի դեպքում: Կհաջողվի՞, թե ոչ, առայժմ բարդ է ասել: «2+2» ձևաչափից հետո կոչը՝ Ուկրաինայում ռազմական գործողություններն անհապաղ դադարեցնելու մասին, ամենևին չի վկայում Դելիի վարքագծի փոփոխություն: Հնդկաստանը նկատելիորեն շարունակում է ՌԴ հանդեպ գործընկերային հարաբերության քաղաքականությունը: ԱՄՆ պետքարտուղար Բլինքենը հայտարարել է, որ ԱՄՆ-ը ցանկանում է դիտվել ամենատարբեր ոլորտներում Հնդկաստանի գործընկեր: Նա նշել է, որ Ռուսաստանի և Հնդկաստանի հարաբերությունը զարգացել է, որովհետև ԱՄՆ-ը չի ունեցել Դելիի հետ լիարժեք գործակցելու հնարավորություն, սակայն ժամանակները փոխվել են: Բլինքենը հավանաբար նկատի է ունեցել Դոնալդ Թրամփի նախագահության շրջանը: «Ժամանակները փոխվել են, այժմ մենք կարող ենք և ցանկանում ենք ընտրված լինել Հնդկաստանի կողմից որպես գործընկերներ խնդիրների ամբողջ սպեկտրում ՝ առևտուր, տեխնոլոգիաներ, կրթություն, անվտանգություն», հայտարարել է Բլինքենը: ԱՄՆ Հնդկաստանի հանդեպ դիտարկում է մտրակի՞, թե՞ կարկանդակի «մեթոդաբանությունը»: Կփոխվի՞ Դելիի վարքագիծը, թե՞ այն կմնա 2019-ի հունիսին Մեծ 20-ի Վեհաժողովի շրջանակում Պուտին-Մոդի-Ցզինպին եռակողմ հանդիպման ուղենիշների շրջանակում, որտեղ կողմերը խոսել էին ունիլատերալիզմի անթույլատրելիության և միջազգային հարաբերություններում մուլտիլատերալիզմի անհրաժեշտության ուղղությամբ համատեղ աշխատանքի մասին:
Ամերիկա-հնդկական քաղաքականության հեռանկարի առումով ուշադրության է արժանի փոփոխությունը, որ տեղի ունեցավ Պակիստանում: Այդ երկրում խորհրդարանն անվստահություն հայտնեց վարչապետ Իմրան Խանին, որն, ի դեպ, այդ իրադարձությունից շաբաթներ առաջ այցելել էր Մոսկվա: Իմրան Խանը իրեն անվստահություն հայտնելու առնչությամբ հայտարարել էր, որ իր պաշտոնանկությունը ցանկանում է ԱՄՆ-ը: Պակիստանի նոր վարչապետ Շահբազ Շարիֆը հայտարարել , որ Պակիստանը պետք է լավ հարաբերություն ունենա ԱՄՆ հետ: Նա խոսել է նաև Հնդկաստանի հետ լավ հարաբերության պատրաստակամության մասին, ասելով սակայն, որ պետք է լուծում ստանա Քաշմիրի հարցը: Արդյո՞ք Նահանգները կարող են փորձել հնդկա-պակիստանյան հարաբերության կարգավորում, Չինաստանի դեմ այսպես ասած հնդկա-խաղաղօվկիանոսյան անվտանգության համակարգի ձևավորման շրջանակում:
Բավականին բարդ է ասել, սակայն տեղի են ունենում իսկապես ուշադրության արժանի իրադարձություններ, որոնք անկասկած իրենց հետքն են թողնում միջազգային անվտանգության համակարգի ամբողջ «պերիմետրով», ներառելով բնականաբար նաև Կովկասը: Ի դեպ, այդ առումով հիշարժան է Հնդկաստանի արտաքին գործերի նախարար Սուբրամանյամ Ջայշանկարի՝ 2021 թվականի հոկտեմբերին Հայաստան կատարած այցը, որտեղ նա մի շարք ուշագրավ հայտարարություններ արեց մասնավորապես տրանսպորային հաղորդուղիների հեռանկարների վերաբերյալ:
