Կառավարության վերջին նիստում ընդունված որոշմամբ փոփոխություն է կատարվել ՀՀ բարձրագույն ուսումնական հաստատությունների ընդունելության կարգում: Ըստ այդմ՝ դիմորդը տվյալ ուսումնական տարում միասնական քննություն կարող է հանձնել երկու անգամ՝ տվյալ տարվա հունվար և հունիս-հուլիս ամիսներին: Բացի այդ, միևնույն առարկայից երկու միասնական քննություն հանձնած դիմորդն անվճար կամ վճարովի ուսուցմամբ հայտագրած համապատասխան մասնագիտության մրցույթին մասնակցում է քննությունից ստացած առավել բարձր միավորով։ Երկու անգամ միասնական քննություն հանձնելու իրավունքի տրամադրման նպատակն է դիմորդին կրկին փորձելու հնարավորություն ընձեռելը՝ հաշվի առնելով քննություն հանձնող դիմորդի հուզմունքն ու բարձր լարվածության գործոնը: Նոր կարգավորմամբ նախատեսվում է տվյալ տարվա դեկտեմբերի 15-ից մինչև դեկտեմբերի 25-ն ընկած ժամանակահատվածում դիմորդների՝ առավելագույնը երկու միասնական քննությունների առցանց հայտագրում և հունվարի 15-ից մինչև փետրվարի 15-ը՝ միասնական քննությունների հանձնում:
Կրթության փորձագետ Սերոբ Խաչատրյանը «Առաջին լրատվական»-ի հետ զրույցում, անդրադառնալով այս փոփոխությանը, նշեց, որ սա դիմորդների համար լրացուցիչ հնարավորություն է ստեղծում անհաջողության դեպքում ևս մեկ անգամ փորձել։
«Այսինքն՝ քննության նպատակը չպետք է լինի այն, որ դիմորդին կտրենք, այլ այն, որ ինքն իրեն պետք է մաքսիմալ դրսևորի և այս փոփոխությունը նրան այդ հնարավորությունը տալիս է: Այսինքն՝ դիմորդը կարող է հանձնել, փորձ ձեռք բերել, բայց մեկ անգամը ռիսկեր ունի, ենթադրենք մարդը հիվանդանում է, կամ ընտանիքում դժբախտություն է պատահում և այդ քննությունը եթե տեղի է ունենում շատ կարճ ժամանակի մեջ, կարող է չհասցնել առողջանալ, և խնդիր առաջանալ։ Եվ եթե հունվարին որոշ խնդիրներ են առաջացել դիմորդի մոտ, հունիսին կհանձնի, այսինքն՝ սա դիմորդին տալիս է ընտրության հնարավորությունների մեծացում»,-ասաց Խաչատրյանը։
Այսպիսով, ՀՀ-ում բարձրագույն ուսումնական հաստատություն ընդունվելն էլ ավելի է հեշտացվում, և սա, կրթության մասնագետի խոսքով, լավ է։ Խաչատրյանը, սակայն, էլ ավելի է կարևորում այն, որ ընդունվելուց հետո ուսանողները սովորեն, կամ բուհերն այնքան բազմազան լինեն, որ հնարավորություն ունենան սովորեցնելու նաև ավելի թույլ դիմորդների, և բնավ պարտադիր չէ, որ բոլոր բուհերը լինեն գիտահետազոտական համալսարաններ.
«Ուղղակի մենք պետք է մեր համալսարանների կառուցվածքը բազմազանեցնենք, որ այդ հնարավորությունը տանք: Այսինքն՝ ոչ միայն գիտական հակումներ ունեցող, այլ նաև ավելի համեստ նպատակներ ունեցող երեխաներն էլ սովորելու հնարավորություն ստանան և սովորեն»:
Այնուամենայնիվ, ըստ Խաչատրյանի, այսօր կա բուհական բազմազանություն, սակայն այստեղ էլ խնդիր կա մարզերի երեխաների հետ կապված, որոնք հաճախ չեն կարողանում Երևան հասնել սովորելու նպատակով:
Կրթության մասնագետի խոսքով՝ որքան դիմորդին ճկուն մեխանիզմներ առաջարկվեն, այնքան լավ և, ամենակարևորը, մենք չպետք է երեխային բռնենք և պատժենք, թե ինչու ցածր ստացար, կարող է այս անգամ ցածր է ստանում, մյուս անգամ հանձնում է շատ լավ: Սա դիմորդի համար ևս մեկ հնարավորություն է:
Լուսանկարը՝ «Panorama.am»-ի
