Փաշինյանի և Ալիևի հետ բանակցություններից հետո Եվրոպական խորհրդի ղեկավար Շառլ Միշելը լրագրողներին ասել է, որ կողմերը որոշել են սկսել խաղաղության պայմանագրի կնքման գործընթացը և ստեղծել սահմանազատման համատեղ հանձնաժողով։ Միաժամանակ նա դժվարացել է նշել համաձայնագրի ստորագրման ժամկետները։ Հանդիպումից մեկ օր առաջ ԱՄՆ պետքարտուղար Էնթոնի Բլինքենը, որը, ի դեպ, Փաշինյան-Ալիև հանդիպման ժամանակ գտնվում էր Բրյուսելում, ասել էր, որ այժմ տարածաշրջանում էսկալացիայի ժամանակը չէ։ Իսկ ԵԱՀԿ գործող նախագահ Զբիգնեւ Ռաուի տարածաշրջան կատարած այցից հետո հայտնի դարձավ, որ ԵԱՀԿ-ն փորձել է վերականգնել Մինսկի ձեւաչափը, սակայն «Ուկրաինայի պատերազմն ամեն ինչ փոխել է»։ Ակնհայտ է դառնում, որ ներկա պայմաններում Ռուսաստանի ներկայությունը ԵԱՀԿ Մինսկի խմբի համանախագահությունում և ռուս-թուրքական «եռակողմ» ձևաչափում ակտուալ չի համարվում։ Արդյոք Եվրամիությունն ու ԱՄՆ-ն առանց Ռուսաստանի ձևաչափ են մշակում: Թեմայի շուրջ «Առաջին լրատվական»-ը զրուցել է քաղաքագետ Էդգար Վարդանյանի հետ:
Վարդանյանի դիտարկմամբ՝ Մոսկվան գիտի, որ հայաստանյան քաղաքական վերնախավում ժողովրդավարական օրակարգով առաջնորդվող մարդիկ են․ «Ռուսական կողմը պետք է հասկանա, Հայաստանից այլ վարք ակնկալելը անհնար է»:
