Վոլոդիմիր Զելենսկին ցանկանում է, որ Ուկրաինայի անվտանգության երաշխավոր երկրների թվում լինեն նաև Չինաստանը և Հնդկաստանը: Ինչպես հաղորդում է «Արմենպրես»-ը, հղում անելով ռուսական ԶԼՄ-ներին, այդ մասին Ուկրաինայի նախագահն ասել է ամերիկյան Fox News հեռուստաընկերությանը տված հարցազրույցում:
«Մենք կուզենայինք, որ Միացյալ Նահանգներին Մեծ Բրիտանիային, Ֆրանսիային, Թուրքիային միանային նաև այն երկրները, որոնք ցանկանում են», – ասել է Զելենսկին:
Մարտի 29-ին Ստամբուլում տեղի ունեցած ռուս-ուկրաինական բանակցությունների ընթացքում ուկրաինական կողմը մի շարք առաջարկներ էր ներկայացրել ռուսական պատվիրակությունը բանակցող խաղաղության պայմանագրում ներառելու համար: Առաջարկների թվում կա կետ Ուկրաինայի կարգավիճակի մասին: Ուկրաինան համաձայնում է ամրագրել իր չեզոք և ոչ միջուկային կարգավիճակը, եթե իրեն տրվեն անվտանգության երաշխիքներ, որոնք «բովանդակությամբ և ձևով պետք է նման լինեն Հյուսիսատլանտյան դաշինքի պայմանագրի 5-րդ հոդվածին»: Դա ներառում է նաև ռազմական օգնություն և ոչ թռիչքային գոտու ստեղծում: Ըստ Կիևի առաջարկի՝ Ուկրաինայի անվտանգության երաշխավորների թվում կարող են լինել ՄԱԿ-ի Անվտանգության խորհրդի մշտական անդամ պետությունները (ներառյալ Ռուսաստանը), ինչպես նաև Գերմանիան, Իսրայելը, Իտալիան, Կանադան, Լեհաստանը և Թուրքիան: