Կառավարության ապրիլի 7-ի նիստում ընդգրկվել էր «Հայաստանի Հանրապետության կառավարության և Ռուսաստանի Դաշնության կառավարության միջև տեղեկատվական անվտանգության ապահովման բնագավառում համագործակցության մասին» համաձայնագրի ստորագրման առաջարկության նախագիծը: Նախագծի հիմնավորման մեջ նշվում է, որ համաձայնագրի կիրարկմամբ նախատեսվում է նպաստել տեղեկատվական անվտանգության ապահովման ոլորտում ՀՀ և ՌԴ միջև փոխգործակցության ընդլայնմանը, ներառյալ՝ սպառնալիքների վերաբերյալ տեղեկատվության փոխանակման և դրանց համատեղ դիմակայման, տեղեկատվական անվտանգության ապահովման նպատակով վստահության ամրապնդման միջոցառումների համաձայնեցման ու իրականացման, օրենսդրական դաշտի վերաբերյալ տեղեկատվության փոխանակման, ոլորտը կարգավորող իրավական դաշտի զարգացման, միջազգային կազմակերպությունների շրջանակներում գործունեության համակարգման, ինչպես նաև կարողությունների զարգացման ուղղություններով:Թեմայի շուրջ «Առաջին լրատվական»-ը զրուցել է ԱՄՆ-ում ՀՀ նախկին փոխդեսպան, միջազգայնագետ Արմեն Խարազյանի հետ:
Դիվանագետը հիշեցրեց՝ 30 տարվա մեջ ՌԴ-ի հետ նման համաձայնագիր Հայաստանը երբեք չի ստորագրել․ «Այսօր երբ ՌԴ-ի տեղեկատվական տեխնոլոգիաների ներուժը քայքայվում է, տարօրինակ է ՀՀ-ի հետ նման համաձայնագիրը»:
Խարազյանի պնդմամբ՝ այս համաձայնագրով Ռուսաստանը զսպելու է Հայաստանի հնարավորությունները․ «ՌԴ-ի հետ նման համաձայնագրի ստորագրումը սեղմելու է Հայաստանի հնարավորությունները: Եթե Հայաստանը փորձի դառնալ պատուհան Ռուսաստանի և Արևմուտքի միջև, ինքը կընկնի պատժամիջոցների տակ»: Խարազյանը հորդորեց կառավարությանը տարողունակ պարզաբանել՝ ինչ կնստի ՀՀ վրա նման համաձայնագրի ստորագրումը: