«Հայ խոհարարական ավանդույթների զարգացման և պահպանման» հասարակական կազմակերպությունը, ՀՀ էկոնոմիկայի նախարարության աջակցությամբ, սույն թվականի սեպտեմբերի 18-ին, Լոռու մարզում կազմակերպում է Խորովածի համահայկական 3-րդ փառատոնը:
Փառատոնն այս տարի կանցկացվի հանրահայտ ֆիլմի անվանումը կրող` «Երբ գալիս է սեպտեմբերը» խորագրով: Փառատոնին հրավիրված է ֆիլմի գլխավոր դերակատար, սիրված դերասան Արմեն Ջիգարխանյանը, որի բրոնզաձույլ արձանը` խորոված անելիս, կբացվի Ախթալայում՝ միջոցառման ընթացքում (մեծ դերասանը տվել է մասնակցության իր նախնական համաձայնությունը): Միջոցառմանը նախատեսվում է նաև աշխարհահռչակ բռնցքամարտիկ Վիկ Դարչինյանի մասնակցությունը: Միջոցառմանը հրավիրված են նաև ՀՀ կառավարության անդամներ, Ազգային ժողովի պատգամավորներ, միջազգային և հասարակական կազմակերպությունների, զբոսաշրջության ոլորտի ներկայացուցիչներ:
ՀՀ էկոնոմիկայի նախարարությունից «Առաջին լրատվականին» հայտնեցին, որ փառատոնի ընթացքում նախատեսվում են մի շարք հետաքրքիր միջոցառումներ: Մասնավորապես` ՀՀ անկախության քսանամյակի կապակցությամբ պատրաստվել է 20 մետրանոց մանղալ, որը փառատոնի ժամանակ տրամադրվելու է Հայաստանում բնակվող ազգային փոքրամասնությունների ներկայացուցիչներին, ինչպես նաև Վրաստանից, Ռուսաստանից, եվրոպական երկրներից ժամանած հյուրերին, որոնք պատրաստելու են խորովածի իրենց ազգային տարատեսակները:
Փառատոնը ձեռք է բերել մեծ մասայականություն և հետաքրքրություն է առաջացրել ոչ միայն Հայաստանում, այլ նաև արտերկրում՝ Վրաստանում, Ռուսաստանում, Եվրոպայում:
