Հայաստանի հունահռոմեական ոճի ըմբշամարտի հավաքականի մարզչական շտաբը և մարզիկները դժգոհում են, որ ամիսներ շարունակ գումարներ չեն ստանում: «Չեմ ուզում շատ բողոքել, բայց այսպես շարունակել հնարավոր չէ: Վնասվածքիս մասին տեղյակ եմ պահել ֆեդերացիային ու նախարարությանը, լուրջ գումարների հետ է կապված, դիմել եմ իրենց, ասել են գնա արա, չեկերը կբերես, կտանք: Դա պատասխան չէ: Գնում ենք Եվրոպայի առաջնություն, վիտամին չունենք նույնիսկ, մարզահագուստ չունենք, դա ամոթ է մեզ համար: Գնում ենք տարբեր շորերով: 10 հոգով գնում ենք, ոչ մեկս ոչ մեկի նման չենք, կարծես փողոցից տղաներով գնանք: Մեդալի համար գոտեմարտից առաջ բժիշկ չունեինք նույնիսկ, որ թևս ստուգեր»,- լրագրողների հետ հանդիպմանն ասաց, Եվրոպայի առաջնության բրոնզե մեդալակիր Գևորգ Ղարիբյանը։
Հավաքականի գլխավոր մարզիչ Էդուարդ Սահակյանը, մարզիչներ Գևորգ Ալեքսանյանը և Սամվել Գևորգյանը, ամփոփելով վերջերս Բուդապեշտում տեղի ունեցած Եվրոպայի առաջնությունը, նշեցին, որ եղած պայմաններն ու ֆինանսավորումը բավարար չեն: Նրանք պնդում են՝ եթե ֆինանսական միջոցները մնան այնքան, որքան հիմա են, թիմը չի կարողանալու լավ նախապատրաստվել, մարզիկները չեն կարողանալու բուժել վնասվածքները, իսկ վիտամիններ արդեն ամիսներ շարունակ չեն ստանում:Հավաքականի մարզիչ Գևորգ Ալեքսանյանը նշեց, որ մեր երկրում սպորտի համար պատասխանատու մարմինները ոչ մի բան չեն անում միջազգային մրցաշարերում մրցավարության հարցը լուծելու համար:
«Իհարկե, մենք էլ կցանկանայինք մեծ կազմով մասնակցել Եվրոպայի առաջնությանը, բայց դա առաջին հերթին գալիս է ֆինանսներից, քանի որ այն գումարը, որը մեզ հատկացվում է, չի բավարարում: Այսօր մենք 7 քաշային կարգում ենք մասնակցել, բայց կարող էինք մասնակցել 10 քաշային կարգում: Եթե մանրամասնեմ՝ մեզ խանգարեցին: Օրինակ, Սլավիկ Գալստյանը պետք է դուրս գար եզրափակիչ: Մենք մեզ արդարացնելու համար չենք բողոքում մրցավարությունից: Դա փաստ է: Մեր երկրում պատկան մարմինները ոչ մի քայլ չեն արել այդ հարցը լուծելու համար: Հավասար գոտեմարտերի դեպքում մրցավարի մի որոշումը կարող փոխել ամբողջ գոտեմարտի ելքը: Արդեն 4-րդ ամիսն է, մենք երկու մրցման ենք մասնակցել, բայց տղաները նույնիսկ վիտամին չեն ստացել: Գնում ենք առաջնության` առանց մարզահագուստի: Բոլորը տարբեր բաներ են հագնում: Մեր տղաները ոչ մեկին չեն զիջում: Օրինակ, ամեն գոտեմարտից հետո վերականգնվելու կարիք կա, բայց մեր տղաները նույնիսկ վիտամին չեն ստանում, նույնիսկ ես էլ եմ ամաչում ավելին պահանջել նրանցից: Մեր բժիշկներն ու մերսողները աշխատավարձ չեն ստանում: Դուք պատկերացրեք արդեն իրավիճակը։ Թուրքիայի հավաքականը, որը մասնակցում էր 10 ըմբիշով, բայց իրենց պատվիրակությունը բաղկացած էր շուրջ 40 հոգուց: Մի քանի բժիշկներ, անձնական մարզիչներ, մերսողներ և այլն: Երբ տեսնեք, թե ինչպես ենք մենք նախապատրաստվում, այդ ժամանակ կտեսնեք նաև մեր դժվարությունները: Ես հույս ունեմ, որ մենք էլ կհասնենք այն վիճակին, որ մեր պատվիրակության կազմում ունենանք օրինակ բժիշկներ»,-ասաց Գևորգ Ալեքսանյանը:
Հիշեցնենք, որ Եվրոպայի առաջնությունում Հայаստանը նվաճել էր 4 մեդալ: Մալխաս Ամոյանը հաղթելով թուրք մրցակցին դարձել էր Եվրոպայի չեմպիոն, իսկ Ռուդիկ Մկրտչյանը, Սլավիկ Գալստյանն ու Գևորգ Ղարիբյանը բրոնզե մեդալ էին նվաճել։
