Նախօրեին Ազատության հրապարակում տեղի ունեցավ «Պաշտպանելով Արցախը` պաշտպանենք Հայաստանը» հանրահավաքը։ Հանրահավաքի կազմակերպիչները պնդում եմ՝ մեկ հանրահավաքով չեն բավարարվելու․ կա գործողությունների ծրագիր։ Իսկ թե որ քաղաքական ուժերը կմիանան նրանց, դեռ հարց է։ ԲՀԿ-ն դեռ չի շտապում պարզաբանել, ԲՀԿ-ականները խուսափում են մեկնաբանություն տալ՝ ակնարկելով, որ դեռ չեն կողմնորոշվել։
Հայաստանի դեմոկրատական կուսակցության ղեկավար Արամ Գ. Սարգսյանը «Առաջին լրատվական»-ի հետ զրույցում նշեց, որ իրենք այդ պայքարի մեջ են. «Մենք միացած ենք 30 տարի Արցախի ազատագրական պայքարին և երբևիցե դրանից չենք հրաժարվել: Մեզ համար միևնույն է՝ ով է կազմակերպում, ով է ներկայանում, մենք գալիս ենք Արցախը պաշտպանելու համար: Երկրորդ, մենք գալիս ենք, որպեսզի այս ապիկար իշխանությանը բացատրենք, որ իրենք որևէ լիազորություն չունեն Արցախի ապագայի մասին որոշում կայացնելու համար: Սա է ամենագլխավորը:
Մեզ համար շատ բացահայտ է, որ Հայաստանի Հանրապետությունը շատ վաղուց ճանաչել է Արցախը Ադրբեջանի կազմից դուրս, գոնե այնքանով, որ բոլորին տվել է ՀՀ քաղաքացու անձնագրեր, տրամադրել է մեր դրամը և հատկացումներ է անում բյուջեից: Դա տեղի է ունեցել դեռ 1990-ականների սկզբին: Հիմա որևէ մեկն իրավասու չէ այդ որոշումները չեղարկել: Առավել ևս, որ իր ցանկացած համաձայնություն կամ ստորագրություն առոչինչ է»,-հայտարարեց Սարգսյանը:
Հարցին, թե ի՞նչ ակնկալիքներ ունեն, որ իշխանափոխությամբ կլուծե՞ն Արցախի հարցը, թե՞ իշխանությանը զսպաշապիկի դեր կստանձնեն, նա պատասխանեց. «Եթե նա փորձի այդպիսի ստորագրությամբ վերադառնալ Բրյուսելից, ապա միանշանակ է իշխանափոխությունը: Ես հիշեցնեմ Լևոն Տեր-Պետրոսյանի ճակատագիրը 1996-1997 թվականներին, որն ավարտվեց 1998-ի հրաժարականով: Հայաստանը կամ պետք է գոյություն ունենա Արցախի հետ միասին, կամ չի կարող գոյություն ունենալ որպես պետություն: Ով դա չի հասկանում, ես իրեն կարող եմ միայն խղճալ»:
Նույն խնդրի առնչությամբ նորաստեղծ «Ուժը Հայրենյաց» կուսակցության ղեկավար Տիգրան Արզաքանցյանը «Առաջին լրատվական»-ի հետ զրույցում նշեց. «Մեր ամբողջ ժողովուրդն էլ այսօր տանջվում է, մտածում է մեր հայրենիքի մասին: Եթե մի անգամ ադրբեջանցիները թուրքերի հետ միասին եկան, անօդաչու «բայրաքթարներով» հասան իրենց նպատակին, ազատագրված տարածքները վերցրեցին, դա չի նշանակում, որ այսօրվա իշխանությունը պետք է մտածի, որ հայ ազգը պարտվել է: Հայ ազգը չի պարտվել: մենք 5-րդ սերնդի զենքեր չենք ունեցել, որ պաշտպանվեինք, այս աղետի մեջ չընկնեինք»:
Հարցին, թե այս լարված իրավիճակում որքանո՞վ է նպատակահարմար հանրահավաքներ անելը, Արզաքանցյանը պատասխանեց. «Ես կարծում եմ, որ հիմա ընդհակառակը պետք է արվի: Ես ասում եմ՝ անձնականի մի տարեք, ձեր կուսակցությունը մի սարքեք ազգի հերոս, այսօր եթե դուք մտածում եք երկրի ու ազգի մասին, եկեք թե արտախորհրդարանական ուժերի հանձնաժողովի հարթակի շրջանակում, թե կառավարության հետ բոլոր կուսակցությունների ղեկավարներով հանդիպենք, նստենք, խոսենք, խելք-խելքի տանք, տեսնենք ի՞նչ կարող ենք օգնել գործող իշխանությանը: Եթե իրենք փորձ չունեն, սխալ են անում, ուղղություն ցույց տանք: Եթե դուք այդքան խելոք եք, ինչո՞ւ եք թուրքին ցույց տալիս, որ մենք մեր ներսում չենք կարողանում իրար հասկանալ, միավորվել:
Ես ասացի՝ կգամ, կմասնակցեմ, կտեսնեմ՝ ինչ է կատարվում, բայց մեզ ոչ մեկը իրենց օրակարգի մեջ չի մտցրել, չի հրավիրել: Ես ասում եմ՝ եթե դու քո երկրի անվտանգության մասին մտածում ես, կապ չունի երկիրն ով է ղեկավարում, դիմի երկրի վարչապետին, ԱԳ նախարարին, բանակի ղեկավարին, եկեք նստենք, խոսենք, հասկանանք, ինչ վիճակի մեջ ենք և մենք ինչով կարող ենք օգնել»:
Արզաքանցյանը կարծիք հայտնեց, որ չպետք է հույսներնս դնենք ռուս խաղաղապահների վրա. «Իրենք հիմա պատերազմի մեջ են, բոլոր կողմերից սահմանափակումների տակ են: Հիմա կարող է 1915 թվականի պատմությունը կրկնվել: Համաշխարհային պատերազմը սկսվեց, Նիկոլայ երկրորդը բանակը հանեց Արևմտյան Հայաստանից, թուրքերը եկան ջախջախեցին մեզ: Եվան ջարդեր, տարածքներ կորցրեցինք: Հետո Լենինն եկավ, թուրքի հետ սկսեցին իրար լպստել ու մենք կորցրեցինք Արևմտյան Հայաստանը: Հիմա ես չեմ ուզում, որ կրկնվի նույնը: Հիմա Ուկրաինայում կարող է ռուսական զորքը չհերիքի կամ Եվրոպան մտնի պատերազմի մեջ, այս խախաղապահներին ռուսները հանեն, թուրքերն էլ նորից հարձակվեն մեզ վրա:
Դրա համար մենք հիմա պետք է հասկանանք՝ ինչ ունենք, ինչ չունենք: Բանակում պետք է աուդիտ արվի, տեսնենք ինչի կարիք ունենք, մեր բանակը հզորացնենք: Առաջին հերթին անվտանգության խնդիրը պետք է լուծենք: Որ կանգնում ասում են՝ էս իշխանությունն էս է անում, էն է անում, ախպեր, մի կանգնեք խոսեք, եկեք խումբ կազմենք, կլոր սեղանի շուրջ նստենք էդ հարցերը բարձրացնենք: Այդ հարցերը մեկ մետրից ասեք, ոչ թե խոսեք, դա մնա օդի մեջ:
Օրինակ, երբ ուզում ես գործարար ոլորտում մի բանի հասնես, եթե ուզում եմ մարդու հետ գործարք կնքես, չես կանգնում չէ՞, հրապարակում ասում՝ եթե ես ձեզ հետ սա անեմ, էսքան օգուտ կստանամ, պետք է գնաս հանդիպես: Իրենք սխալ են:
Վարչապետն էլ ասել է, որ պատրաստ է նրանց հետ հանդիպել, քննարկել: Բա էլ ինչի՞ են ելնում փողոցում գոռգոռում, թող գան նստեն խոսեն մարդու հետ: Երբ որ իրենք երկրի ղեկավարն էին, Փաշինյանը գալիս իրենց հետ խոսում էր: Պետք է հարգել ժողովրդի տված ձայնը, էսօր այդ մարդկանց են տվել ձայնը: Ես ոչ թե ասում եմ՝ իրենք բոլորից լավն են, ճիշտ են ասում, այլ ասում եմ՝ օրենքով այսօր իշխանությունն իրենք են:
Մենք էլ ենք ընդդիմադիր, բայց չենք գոռում, թե մենք ընդդիմադիր ենք ու վսյո: Այսօր մենք անձի խնդիր չենք լուծում: Եթե ընդդիմադիր ես, համագործակցի այսօր եղած իշխանության հետ, ինչ ներդրումներ կարող ես անել անվտանգության համար, տնտեսությունը զարգացնելու համար, որ կարողանանք մի բանի հասնենք, պաշտպանենք մեր երկիրը»,-ընդգծեց Արզաքանցյանը:
