Արդեն երկու օր է՝ համացանցի հայալեզու հատվածում ակտիվորեն քննարկում են «Լուսան» անվանմամբ բազմաֆունկցիոնալ լիաքարշ զինված մեքենաները։ Ըստ տարատեսակ հրապարակումների՝ նշված լուսանկարով մեքենաներն արտադրվում են Հայաստանում։ Այս թեման տարածվել է նաև տարբեր լրատվամիջոցներով։
Ըստ հրապարակումների՝ այս զրահապատ մեքենան ներկայացվել է նաև օրեր առաջ կայացած «ԱրմՀայԹեք 2022» պաշտպանական տեխնոլոգիաների ցուցահանդեսում։
Ուսումնասիրելով համացանցում և լրատվամիջոցներում տարածվող լուսանկարները՝ պարզ է դառնում, որ կոնկրետ այդ լուսանկարներում պատկերվածները Հայաստանում չեն արտադրվել։ Ավելին՝ այս լուսանկարները նախկինում հրապարակված են եղել սոցիալական ցանցերում։
Այս նույն լուսանկարները հրապարակված են նաև «Լուսանի» պաշտոնական կայքում։ Սոցցանցերում տարածվող լուսանկարները, ամենայն հավանականությամբ, վերցված են հենց պաշտոնական կայքում առկա լուսանկարներից։
Լուսանկարներից առաջինը վերցված է «Լուսանի» պաշտոնական կայքից, երկրորդը՝ Armor ֆեյսբուքյան էջից:
«Լուսանի» պաշտոնական կայքում առկա լուսանկարներից մեկն էլ հնարավոր է գտնել այլ կայքերում՝ հրապարակված դեռևս 2020 թվականի հունիսին։ Ընդ որում, հին հրապարակված լուսանկարում երևում է, որ զրահապատ մեքենայի պետհամարանիշների վրա գրված է Buran, իսկ «Լուսանի» կայքում առկա լուսանկարում այն բացակայում է։
Լուսանկարներից առաջինը «Լուսանի» պաշտոնական կայքից է, երկրորդը՝ hotcars.com կայքից:
Ներկայացվող բոլոր լուսանկարներում ռուսական արտադրության «Բուռան» զրահապատ մեքենաներ են։
Ոչ թե արտադրվելու, այլ հավաքվելու են Հայաստանում
Չարենցավանի հաստոցաշինական ընկերության տնօրեն Արտյոմ Մեհրաբյանը FIP.am-ի հետ զրույցում ասաց, որ առայժմ շատ մանրամասներ չի կարող ասել մեքենաների արտադրության հետ կապված, այդուհանդերձ նշեց, որ մեքենաները ոչ թե արտադրվելու, այլ հավաքվելու են Հայաստանում․ «Կարամ ասեմ մի բան, որ ունենք արդեն համաձայնություն, որ իրավունք ունենք նման ավտոմեքենաներ արտադրելու, այսինքն ոչ թե արտադրանք, այլ մեքենաների հավաքում ՀՀ-ում։ Ունենք պայմանագիր և այս տարի՝ երևի մեկ ամսից, կսկսենք հավաքել մեքենաները»։
Ընկերության տնօրենի խոսքով՝ ռուսաստանյան «Բուռան» մեքենաներն արտադրող կազմակերպությունը մեքենաների նախագծերն ու ինժեներական բոլոր փաստաթղթերը տալիս է տարբեր երկրներում գործող նմանատիպ կազմակերպություններին, այդ թվում՝ տվել է Չարենցավանի հաստոցաշինական գործարանին։
«Մենք ունենք պատվեր և մեկ ամսից հետո էդ պատվերը կատարելու ենք։ Մենք 2 հատ հավաքել ենք, փորձարկումը կատարել ենք անցյալ տարի։ Փորձարկումներն անցել են դրական, որի հիման վրա կնքել ենք պայմանագիր»,- ասաց Մեհրաբյանը։
Ինչ վերաբերում է «ԱրմՀայԹեք 2022» պաշտպանական տեխնոլոգիաների ցուցահանդեսին իրենց մասնակցությանը, ապա Մեհրաբյանն ասաց, որ իրենք ոչ մի բան չեն ներկայացրել, «որովհետև դրա կարիքը չունեն»։ Ներկայացվել են միայն մեքենայի մակետը և Հայաստանում կատարված փորձարկման տեսահոլովակները։
Այսպիսով՝ տարածվող լուսանկարների զրահապատ մեքենաները ռուսական արտադրության են, որոնք առաջիկայում ոչ թե կարտադրվեն, այլ պարզապես կհավաքվեն նաև Հայաստանում։
