Գեղարքունիքի մարզպետ Կարեն Սարգսյանը մարզպետարանում ընդունել է ՀՀ սննդի անվտանգության տեսչության պետ Գեորգի Ավետիսյանին։ Տեղեկացնում է Գեղարքունիքի մարզպետարանը։
Հանդիպման ընթացքում քննարկվել են Գեղարքունիքի մարզում սննդի անվտանգության կանոնների պահպանման, սպանդանոցային մորթի ապահովման և անասնահամաճարակների դեմ պայքարի միջոցառումների իրականացման հետ կապված հարցեր։
Կարևորվել է սպանդանոցային մսի և մսամթերքի վաճառքի կազմակերպման գործընթացը և փողոցային մորթի, անհայտ ծագման մսամթերքի վաճառքի արգելումն ու բացառումը, ինչպես նաև անասնահամաճարակների դեմ ուղղված միջոցառումների իրականացումը սահմանված ժամկետներում, առանց թերացումների կամ բացթողումների։
2022 թվականի ապրիլի մեկի դրությամբ մարզում գործարկման են պատրաստ յոթ սպանդանոց, երկու սպանդանոցի շահագործումն էլ գտնվում է ավարտական փուլում։
Գեորգի Ավետիսյանը խոսել է Ներքին Գետաշենի մեծածախ շուկայի և անասնաշուկայի գործունեության կանոնակարգման անհրաժեշտության մասին, նշելով, որ պետք է համատեղ ուժերով հասնենք նրան, որ այստեղ բացառվի ոչ հիգիենիկ պայմաններում կազմակերպվող սննդամթերքի, անհայտ ծագման մսամթերքների, նաև` թունաքիմիկատների, անասնաբուժական դեղերի վաճառքը, վերահսկվի նաև վաճառվող անասունների շարժը` հետագա անախորժ դեպքերից խուսափելու համար:
Մարզպետարանն էլ իր հերթին պատրաստակամ է` օրենքով նախատեսված բոլոր միջոցառումներին համապատասխան աջակցություն ցուցաբերելու, սննդի անվտանգության տեսչության հետ մշտական համագործակցություն իրականացնելու համար։
