Ռուս-ուկրաինական պատերազմի հետևանքով Ռուսաստանի նկատմամբ կիրառվող պատժամիջոցներն ինչպես կազդեն Հայաստանի տնտեսության զարգացումների և տնտեսական աճի վրա։ Որ ազդեցությունը կլինի, միանշանակ է, բայց գնահատական տալն առայժմ վաղ է։ Սպասվում է, որ կկրճատվեն ինչպես առևտրաշրջանառությունները, այնպես էլ Ռուսաստանից ստացվող ֆինանսական հոսքերը։ Տնտեսական իրավիճակի վատացման և ռուբլու արժեզրկման հետևանքով դժվարություններ կստեղծվեն արտահանման ու իրացման շուկաներում։ Տարբեր գնահատումներով՝ այս տարի Ռուսաստանում տնտեսական անկումը կարող է ընդհուպ մինչև երկնիշ լինել։ Հաշվի առնելով Հայաստանի և Ռուսաստանի տնտեսությունների անմիջական ու ընդգրկուն կապերը, այդ անկումը տարբեր ուղղություններով կփոխանցվի երկու երկրների տնտեսական ու ֆինանսական հարաբերությունների վրա։ Թե մեր տնտեսությունը ո՞ւր կհայտնվի, կտեսնենք ապագայում. անորոշությունները չափազանց շատ են։ Հիմնական խնդիրներն են արտահանումը, Ռուսաստանից փոխանցվող տրանսֆերտների արժեզրկումն ու պակասումը։ Մեկ ամսից ավելի արտահանողները լուրջ խնդրի առաջ են կանգնել և սպասում են իրավիճակի որոշակի կայունացման: Ռուսաստանը մեր հիմնական արտահանման շուկան է, արտահանվող ապրանքի 30%-ը գնում է այդ երկիր: Հնչող որոշ կանխատեսումների համաձայն՝ այս ամենը կբերի նրան, որ Հայաստանից արտահանումը Ռուսաստան կնվազի 40-50 տոկոսով։ Սա շուրջ 400 մլն դոլարի վնաս է ենթադրում Հայաստանի տնտեսության համար։ Իսկ այսօր գտնել Ռուսաստանին փոխարինող արտահանման շուկա՝ արդյո՞ք իրատեսական է։ Թեմայի շուրջ «Առաջին լրատվական»-ը զրուցել է ԵՊՀ Տնտեսագիտության և կառավարման ֆակուլտետի դեկան Հայկ Սարգսյանի և «Անտարես» հոլդինգի ղեկավար Արմեն Մարտիրոսյանի հետ:
Հայկ Սարգսյանը կարծում է, որ Ռուսաստանի նկատմամբ դաժան պատժամիջոցները անհետևանք չեն անցնելու Հայաստանի համար․ «Մենք հաղորդակից անոթներով կապված ենք Ռուսաստանի հետ և Հայաստանը չի կարող անմանս մնալ պատժամիջոցներից: Տնտեսական առումով ունենալու ենք լուրջ կորուստներ»:
Արմեն Մարտիրոսյանն էլ իր հերթին կարծում է,որ անկախ նրանից ինչպես կավարտվի ռուս-ուկրաինական պատերազմը, մենք պետք է զուսպ լինենք և հասկանանք,որ ինչու օրինակ Ուրուգվայի վրա պատժամիջոցները չեն ազդի, բայց Հայաստանի վրա կազդի: Երկու բանախոսներն էլ, սակայն Հայաստանի հիմնական մարտահրավերը համարում են ինքնիշխանության կորուստը:
