Մոսկվայի և Համայն Ռուսիո պատրիարք Կիրիլը մերձմոսկովյան Կուբինկայում Ռուսաստանի զինված ուժերի գլխավոր տաճարում պատարագի ժամանակ հայտարարել է, որ ռուս ժողովուրդը չունի պատերազմի կամ ուրիշներին վնասելու ցանկություն, բայց պատրաստ է պաշտպանել իր հայրենիքը: Միաժամանակ նա կոչ է արել աջակցել զինվորականներին Ուկրաինայի դեմ պատերազմում:
Մոսկվայի պատրիարքը պաշտոնապես աջակցություն է հայտնել Ուկրաինայի դեմ պատերազմին, որի պատճառով սուր քննադատության է ենթարկվել։ Կիրիլ Գունդյաեւի այս կեցվածքի պատճառով Ռուս ուղղափառ եկեղեցու բազմաթիվ թեմեր որոշել են խզել կապերը Մոսկվայի պատրիարքարանի հետ, Կիրիլի անունը դադարել են հնչեցնել եկեղեցիներում։
ՌՈՒԵ Մոսկվայի պատրիարքարանը ստեղծել է Ստալինը, եւ այդ պահից ի վեր պատրիարքարանը եղել է պետության եւ հատուկ ծառայությունների կցորդը եւ գործիքը։ Ներկայում այս կառույցն օգտագործվում է տարբեր տարածաշրջաններում ռուսական էքսպանսիայի համար։
Մոսկվայի պատրիարքարանը օգտագործվում է նաեւ Հայաստանի դեմ Ռուսաստանի քաղաքականության մեջ, մասնավորապես Արցախում հայկական ինքնությունը եւ հոգեւոր ժառանգությունը ոչնչացնելու եւ եկեղեցիները յուրացնելու հարցում, Բաքվի հետ սերտ համագործակցությամբ։ Մոսկվայի պատրիարքարանը թեմ է բացել նաեւ Հայաստանում, հայկական ինքնության հենասյուները ոչնչացնելու անթաքույց նպատակով։
Ռուսական փորձագիտական շրջանակներում կարծիքներ են հնչում, որ Ուկրաինայի դեմ պատերազմի հետեւանքներից մեկը կարող է լինել այն, որ արհեստածին Մոսկվայի պատրիարքարանը կարող է դադարել իր գոյությունը։
