CNN-ի եթերում խոսել է Վրաստանի նախագահ Սալոմե Զուրաբիշվիլին հայտարարել է, որ Վրաստանը միանում է բոլոր միջազգային պատժամիջոցներին, որոնք սահմանվել են Ռուսաստանի Դաշնության դեմ Ուկրաինայի դեմ լայնածավալ ագրեսիայի պատճառով։
Նա հավելել է, որ վրացական կողմը պաշտպանում է ուկրաինական պետության աջակցության վերաբերյալ բոլոր միջազգային բանաձևերը․«Մենք մասնակցում ենք Ռուսաստանի Դաշնության դեմ բոլոր միջազգային ֆինանսական պատժամիջոցներին, և դա իսկապես արդեն ինչ-որ բան է նշանակում մեր ֆինանսական հատվածի համար»,- ասել է պետության ղեկավարը։
Վրաստանի նախագահի հայտարարությունը ակտիվորեն քննարկվում է և շատերի կարծիքով՝ մենք գործ ունենք Վրաստանի նոր քաղաքական դիրքորոշման հետ։
Վրաց քաղաքագետ Գելա Վասաձեն, սակայն, «Առաջին լրատվական»-ի հետ զրույցում պարզաբանեց․«Իրականում երբ մենք խոսում ենք միջազգային պատժամիջոցներին միանալու մասին՝ եկեք ուղիղ խոսենք․ այս ամենը նորություն չէ։ Այսպես թե այնպես Վրաստանը ամենասկզբից էլ միացել էր բոլոր միջազգային պատժամիջոցներին։ Երբ Վրաստանի վարչապետը խոսում էր այն մասին, որ Վրաստանը չի միանա Ռուսաստանի դեմ սահմանվող պատժամիջոցներին՝ նա բոլորովին այլ բան նկատի ուներ։ Նա նկատի ուներ, որ Վրաստանը սեփական պատժամիջոցները չի սահմանի Ռուսաստանի դեմ։ Մոսկվային էլ հաճելի էր դա լսել»։
Վասաձեի խոսքերով՝ ամենայն հավանականությամբ մտածում էր, որ եթե Մոսկվային հաճելի է , իրենց վրա հարձակումներ չեն լինի․«Ուստի սա հին մոտեցում է։ Մեր իշխանությունները հերթական անգամ հիմարություն արեցին, ուրիշ էլ ո՞նց անվանես ։ Չնայած հաշվարկն այն էր, որ Մոսկվային դուր գան ու հարաբերությունները չսրեն»։
Թե ինչու Վրաստանը չի սահմանում նոր պատժամիջոցներին, քաղաքագետը բացատրում է հետևյալ կերպ․«Իսկապես Վրաստանը նման քայլի չի գնում, ռուսական բիզնեսի մեծ մասը կապակցված է իշխանության հետ։ Եթե Վրաստանը չմիանար միջազգային պատժամիջոցներին, ինքն էլ կհայտնվեր դրանց տակ ու դա Թբիլիսիում շատ լավ հասկանում են։ Բայց փոխարենը Վրաստանի կառավարության դիրքորոշումն օգտագործվեց փիարի համար՝ տեսեք Վրաստանը չի միանում։ Հիմա խոսել այն մասին, որ որևէ նոր բան կա, ինչ-որ բան է հնարավոր փոխել՝ անիմաստ է, ոչ մի բան էլ չի փոխվում։ Ո՛չ Վրաստանը կտուժի, ո՛չ էլ հարևան երկրները»։
Վասաձեն ընդգծում է՝ Վրաստանի նախագահ Սալոմե Զուրաբիշվիլին պարզապես բացատրել է առկա իրավիճակը․«Եվ այն կոչվում է ստատուս քվո, դրանից օյ-օյ-օյ եզրակացություններ անել պետք չէ»,-եզրափակեց նա։
