ԱՄՆ-Հայաստան Ռազմավարական երկխոսության հերթական նիստը կանցկացի Միացյալ Նահանգներում՝ հաջորդ ամիս։ Դրան մասնակցելու է ԱԳ նախարար Արարատ Միրզոյանը։ Օրակարգի վերաբերյալ առայժմ մանրամասներ չեն հաղորդվում։
Հիշեցնենք, որ ՀՀ-ԱՄՆ ռազմավարական երկխոսության երկրորդ առցանց նիստը տեղի է ունեցել Մարտի 23-ին։ Այդ ընթացքում քննարկվել են պաշտպանական և անվտանգային ոլորտներում երկկողմ համագործակցությանը վերաբերող հարցեր։
Հայկական կողմից նիստին մասնակցում էին ՀՀ արտաքին գործերի, պաշտպանության, տարածքային կառավարման և ենթակառուցվածքների, արտակարգ իրավիճակների, բարձր տեխնոլոգիական արդյունաբերության նախարարությունների, Անվտանգության խորհրդի գրասենյակի, Պետական եկամուտների կոմիտեի ներկայացուցիչներ, ամերիկյան կողմից՝ Պետքարտուղարության, Պաշտպանության դեպարտամենտի ներկայացուցիչներ։Նիստի ավարտին հայկական և ամերիկյան կողմերի պաշտոնյաները վերահաստատել էին փոխադարձ հանձնառությունը՝ խորացնելու համագործակցությունը պաշտպանության և անվտանգության ոլորտներում, նախանշեցին ոլորտային առաջնահերթությունները և առաջիկա անելիքները:
Քաղաքական մեկնաբան Հակոբ Բադալյանը գտնում է, որ Հայաստան-ԱՄՆ ռազմավարական երկխոսության ձևաչափն անկասկած կարևոր ուղղություն է Հայաստանի արտաքին քաղաքականության և անվտանգության խնդիրների համատեքստում․ «Եվ այս առումով, նոր նիստը, որ տեղի է ունենալու Միացյալ Նահանգներում անցկացվի արտաքին գործերի նախարարների մակարդակով, այսինքն նրանք գլխավորությամբ՝ սա իհարկե որոշակի քաղաքական իմաստավորվածության բավականին բարձր աստիճան է։ Շատ կարևոր է անշուշտ, որ այդ աստիճանը չմնա լոկ արարողակարգային մակարդակում, այսինքն՝ ստանա նաև որոշակի հագեցված բովանդակություն ընդհանրապես հարաբերությունը խորացնելու ու զարգացնելու իմաստով։ Այս տեսանկյունից գերագնահատել ռազմավարական երկխոսության ու հարաբերությունների զարգացման կարևորությունը գործնականում շատ դժվար է»,-«Առաջին լրատվական»-ի հետ զրույցում ասաց նա։
Ըստ Բադալյանի՝ պետք է նկատի ունենալ այն, որ շատ կարևոր է հարաբերությունների խորացման բազմաշերտ ու բազմաստիճան հեռանկարները՝ այդ թվում նաև տնտեսական ուղղությամբ․ «Վերջին հաշվով՝ տնտեսական փոխադարձ հետաքրքրությունները կազմում են քաղաքականության ու անվտանգության չափազանց կարևոր մի շերտ, որից այսօր մեծ հաշվով հայ-ամերիկյան հարաբերությունը զուրկ է։ Իհարկե զրոյական չէ, բայց բավական կարևոր մի աստիճանից հայ-ամերիկյան հարաբերությունը զուրկ է։ Այստեղ պետք է շեշտը դնել իրավիճակի զարգացման այս ուղղության վրա և օգտագործել նաև ամերիկահայության ներուժը»։
Դիտարկմանը, թե ուկրաինական պատերազմի ֆոնին ինչպե՞ս կընկալի այս այցելությունն ու այս ուղղությամբ մեր ակտիվացումը Ռուսաստանը, Հակոբ Բադալյանը պատասխանեց․ «Նախ պետք է արձանագրել, որ մենք մեր արտաքին քաղաքականությունը կառուցելիս պետք է հաշվարկենք այն ընկալումները, որ կարող են լինել Ռուսաստանում։ Բայց մյուս կողմից մեզ համար առանցքային պետք է լինի այն, թե ինչ է անհրաժեշտ Հայաստանին։ Իսկ Հայաստանին այս իրավիճակում անհրաժեշտ է աշխատել թե՛ ռազմավարական դաշնակից համարվող Ռուսաստանի հետ և թե՛ նվազագույնը հակառակ բևեռի առաջատար ու փաստացի թիվ մեկ գերտերություն Միացյալ Նահանգների հետ։ Երբ ԱՄՆ-ն ու Ռուսաստանը չափազանց սուր դիմակայության մեջ են և փաստացի բավականին կոշտ պայքար է ընթանում նոր աշխարհակարգում տեղի ու դերի համար, Երևանի խնդիրն է աշխատել այդ երկու բևեռների հետ՝ չճզմվելու համար։ Իրավիճակը կարող է լինել ոչ այնքան միարժեք։ Այսինքն՝ մի ուղղությամբ Միացյալ Նահանգների հետ կոշտ դիմակայության մեջ գտնվող Ռուսաստանը, Ռուսաստանի քաղաքական ու ռազմաքաղաքական վերնախավը՝ ամենևին բացառված չէ, որ այլ ուղղություններով ունենա ինչ-որ կոմունիկացիայի անհրաժեշտություն նույն ԱՄՆ-ի հետ։ Հայաստանը կարող է օգտագործել այսպիսի հավանականությունը»։
Բադալյանը հակված չէ մտածել, որ միջազգային իրողությունները բացարձակ միարժեք տրամաբանության մեջ են, հետևաբար Հայաստանը պետք է փորձի գտնել հնարավորությունների դաշտերը՝ բալանսավորելու ու հարաբերությունները հավասարակշռված կառուցելու համար․ «Բնականաբար սա չպետք է արվի Ռուսաստանի հետ հարաբերությունները վատացնելու հաշվին, բայց պետք է աշխատել հենց Ռուսաստանում համարժեք ընկալումներ ձևավորելու ու ըստ այդմ Միացյալ Նահանգների հետ առավելագույնս արդյունավետ աշխատելու համար։ Իհարկե պետք է գերխնդիրը լինի խուսափելը մրցակցության առարկա դառնալուց, որովհետև երկու պարագայում էլ մրցակցության օբյեկտ դառնալը բացարձակապես օգտակար ռեժիմ չէ»,-եզրափակեց նա։
Քաղաքագետ Ռուբեն Մեհրաբյանը համարում է, որ Արարատ Միրզոյանի այցը ԱՄՆ շատ կարևոր է Հայաստանի բոլոր քաղաքականությունների դիվերսիֆիկացման հրամայականին ընդառաջ․ «Որովհետև բացարձակապես ակնհայտ է, որ Հայաստանի հարցերը լուծում ունեն գլոբալ հարցերի լուծման համատեքստում։ Ու այստեղ շատ կարևոր է ճիշտ դիրքավորվել, որպեսզի Հայաստանի հարցերի լուծումը դառնա ոչ թե խնդրի մաս, այլ խնդրի լուծման մաս։ Այդ իմաստով այո՛ սա շատ կարևոր զարգացում է ու մեր արտգործնախարարի այցը Միացյալ Նահանգներ ձեռք է բերում չափազանց կարևոր նշանակություն»,-«Առաջին լրատվական»-ի հետ զրույցում ասաց նա։
Ըստ Մեհրաբյանի՝ Ռազմավարական երկխոսություն ձևաչափին նոր բավանդակություն հաղորդելու իմաստով ևս արտաքին գերատեսչության ղեկավարի այցը Միացյալ Նահանգներ կարևոր է․ «Նոր բովանդակություն՝ պայմանավորված աշխարհում տեղի ունեցող իրադարձություններով։ Ի վերջո հասկանալի է, որ այն աշխարհակարգը, որում մենք ապրում էինք մինչև փետրվարի 24-ը, այլևս գոյություն չունի և նո աշխարհակարգը ծնվում է այս ռուս-ուկրաինական պատերազմի բովում։ Ինչպիսին կլինի Հայաստանի տեղը, դերը, նշանակությունն այդ վաղվա աշխարհակարգում՝որոշվում է այսօր կատարած քայլերով ու որոշումներով։ Այդ իմաստով՝ սա չափազանց կարևոր ու դրական զարգացում է»,-եզրափակեց նա։
