Խորհրդարանի ՀՅԴ-ական փոխխոսնակ, Հայաստան խմբակցության ներկայացուցիչ Իշխան Սաղաթելյանը խորհրդարանի արտահերթ նիստում ելույթ ունենալով հայտարարել է, որ այս խորհրդարանը համարժեք չէ Հայաստանի առաջ եղած մարտահրավերներին և ի վիճակի չէ արձագանքել դրանց:
Խորհրդարանի արտահերթ նիստը ՔՊ մեծամասնությունը հրավիրել է ՏԻՄ մասին օրենքում փոփոխության համար, որն ըստ էության պայմանավորված է Վանաձորում քաղաքապետի ընտրության հարցը լուծելու մղումով, քանի որ նախորդ քաղաքապետ Մամիկոն Ասլանյանը չնայած իր դաշինքով հաղթել է ամիսներ առաջ տեղի ունեցած նոր ընտրությանը, բայց հետո կալանավորվել է չարաշահումների գործով և Վանաձորը առ այսօր չունի քաղաքապետ: ՏԻՄ օրենքում փոփոխության առիթով հրավիրված արտահերթ նիստում խորհրդարանական ընդդիմությունը իր ելույթներում անդրադարձել է անվտանգային հարցերին և արցախյան իրավիճակին: Դա ընդդիմության համար միանգամայն օբյեկտիվ պահվածք է և թերևս հենց դրանով էլ պետք է զբաղվի ընդդիմությունը, մշտապես պատասխանատվության տակ պահելով կառավարող մեծամասնությանը:
Ամբողջ հարցն այն է, որ Հայաստանի խորհրդարանական ընդիմությունը այդ ամենն անում է հիմնականում նենգափոխումների վրա կառուցված մարտավարությամբ, կամ այսպես ասած՝ ընդամենը իշխանության վարկանիշի «քոքը մաշեցնելու» տրամաբանության շրջանակում, գործնականում ինքզինք զերծ պահելով իր իսկ բարձրացրած հարցերի համատեքստում կոնկրետ քաղաքական դիրքորոշման և դրա համար պատասխանատվություն ստանձնելու քայլից: Ահա այդ առումով, Իշխան Սաղաթելյանը լիովին իրավացի է, Հայաստանի ներկայիս խորհրդարանը բացարձակապես հեռու է Հայաստանի առաջ ծառացած մարտահրավերներին համարժեք լինելուց, որովհետև այդ խորհրդարանը չունի թե քաղաքականապես համարժեք և կոմպետենտ մեծամասնություն, թե պատասխանատու և բովանդակային քաղաքական ընդդիմություն: Ավելին, ինչպես գործնականում միշտ, այսօր առավել ևս Հայաստանի գերխնդիրը կառավարող ուժին որակապես, գաղափարապես, բովանդակային առումով լրջմիտ այլընտրանքի բացակայությունն է, ինչի հետևանքով «քարանում» է ներքաղաքական ստատուս-քվոն և զրկում Հայաստանը քաղաքական ճկունությունից և դիմադրունակությունից: Այդպես էր հեղափոխությունից առաջ, և ըստ էության նաև այդ պատճառով էլ այդպես է հեղափոխությունից հետո:
Լուսանկարը՝ panorama.am-ի
