Եվրամիության և Չինաստանի առաջնորդները ուրբաթ օրը սկսեցին առցանց գագաթնաժողովը, որում Բրյուսելը կփորձի ազդել Պեկինի վրա՝ Մոսկվայի հետ հարաբերությունները վերանայելու համար։ Գագաթնաժողովի բացման պահը առցանց ցուցադրել է Եվրահանձնաժողովի մամուլի ծառայությունը։ Հրապարակային հայտարարություններ չեն արվել։
Չինաստանը գագաթնաժողովում ներկայացնում են նախագահ Սի Ցզինպինը և վարչապետ Լի Կեցյանը, իսկ Եվրամիությունը՝ Եվրախորհրդի և Եվրահանձնաժողովի նախագահներ Շառլ Միշելը և Ուրսուլա ֆոն դեր Լեյենը, ինչպես նաև՝ ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը։ Սպասվում է, որ գագաթնաժողովը կտևի մոտ երեք ժամ, որից հետո ԵՄ առաջնորդները ասուլիս կհրավիրեն։
Ըստ փորձագետների՝ Չինաստանը կցանկանար, որ գագաթնաժողովի օրակարգը բաղկացած լինի միայն երկկողմ հարաբերությունների հարցերից, սակայն, ըստ Բրյուսելի, Ուկրաինայի իրավիճակն այս կամ այն կերպ վերաբերում է բոլոր հարցերին։ ԵՄ առաջնորդները, մասնավորապես, կխնդրեն Չինաստանին՝ «օգտագործել իր ազդեցությունը Ռուսաստանի վրա»՝ ռուս-ուկրաինական հակամարտությունն ավարտելու համար։ Շառլ Միշելն ու ֆոն դեր Լայենը կփորձեն համոզել Պեկինին՝ չօգնել Մոսկվային՝ շրջանցելու սահմանված պատժամիջոցները, և չտրամադրել ռազմական աջակցություն։