Մարտի 31-ին Եգիպտոսում ՀՀ դեսպան Հրաչյա Փոլադյանն իր հավատարմագրերն է հանձնել Եգիպտոսի Արաբական Հանրապետության նախագահ Աբդել Ֆաթթահ աս-Սիսիին։ Կարճատև զրույցի ընթացքում ՀՀ դեսպանը նախագահ աս-Սիսիին փոխանցել է ՀՀ նախագահ Վահագն Խաչատուրյանի ջերմ ողջույններն ու բարեմաղթանքները։ Դեսպան Փոլադյանը նշել է, որ հայկական կողմը մեծ ակնկալիքներով է սպասում Եգիպտոսի առաջնորդի՝ Հայաստան պաշտոնական այցին։ Պատասխան խոսքում Եգիպտոսի առաջնորդն իր հերթին ասել է, որ կօգտվի ընձեռած հնարավորություններից՝ այցելելու Հայաստան։ Շնորհավորելով ՀՀ դեսպանին հավատարմագրերի հանձնման կապակցությամբ՝ ԵԱՀ նախագահ աս-Սիսին բարձր է գնահատել հայ-եգիպտական ավանդական բարեկամական հարաբերությունները և հաջողություն մաղթել ՀՀ դեսպանին իր առաքելության մեջ։
Արաբագետ Արմեն Պետրոսյանն «Առաջին լրատվական»-ի հետ զրույցում հիշեցրեց, որ վերջին մի քանի օրերի ընթացքում նման ուղերձներ հղվել են մի քանի արաբական երկրների ղեկավարների կողմից․«Մասնավորապես գիտենք, որ բացի Եգիպտոսում ՀՀ դեսպանից նման հրավեր ու ուղերձ հղվել է Լիբանանում ՀՀ դեսպանի կողմից՝ Լիբանանի նախագահին։ Այստեղ ես կարող եմ մի քանի հանգամանք առանձնացնել։ Առաջինը՝ չի բացառվում, որ նման ուղերձների հղումը ՀՀ նոր նախագահ Վահագն Խաչատուրյանի գործունեության հետ է կապված։ Կարծես թե որպես նախագահ փորձում է ակտիվանալ ու բոլոր հնարավոր ուղղություններով ակտիվացնել Հայաստանի ու բարեկամական երկրների միջև բարձր մակարդակի համագործակցությունը»։
Ինչ վերաբերում է կոնկրետ Եգիպտոսի հետ համագործակցությանը, ապա Պետրոսյանի դիտարկմամբ, այն շատ կարևոր է Մերձավոր Արևելյան տարածաշրջանում, արաբական աշխարհում, բայց նաև բավականին ընդհանուր մոտեցումներ կան Հայաստանի ու Եգիպտոսի միջև՝ հատկապես տարածաշրջանային մի շարք հիմնախնդիրների առումով․ «Այնպես որ Եգիպտոսի հետ հարաբերությունների զարգացումը շատ կարևոր նշանակություն ունի Հայաստանի Հանրապետության Մերձավոր արևելյան քաղաքականության համատեքստում»։
Մեր զրուցակիցը ողջունում է Եգիպտոսում որպես արտակարգ և լիազոր դեսպան Հրաչյա Փոլադյանի նշանակումը․«Որպես արաբագետ առիթ ունեցել եմ մշտապես հետևել նրա գործունեությանը։ Ակնհայտ հաջողություններ են գրանցվել պարոն Փոլադյանի նախկին պաշտոնավարման երկրի՝ Իրաքի հետ հարաբերություններում։ Եթե կհիշեք՝ այնտեղ բացվեց հյուպատոսություն, մշակութային կենտրոն և լուրջ խթան հաղորդվեց Հայաստան-Իրաք հարաբերություններին։ Ես վստահ եմ, որ Եգիպտոսի հետ ևս՝ դեսպանի ջանքերի շնորհիվ, մենք ականատես ենք լինելու հարաբերությունների ակտիվացմանը։ Ընդ որում՝ դա բավականաչափ կարևոր է, որովհետև հատկապես 2010 թվականից մեկնարկած, այսպես կոչված, «արաբական գարնան» հեղափոխական գործընթացներից հետո, որից զգալիորեն տուժեց նաև Եգիպտոսը, որոշակի հարաբերությունների պասիվություն էր արձանագրվում նաև Հայաստանի ու Եգիպտոսի միջև հարաբերություններում։ Այսինքն՝ Հայաստանի անկախացման առաջին երկու տասնամյակների ակտիվության համեմատ, երրորդ տասնամյակում՝ 2010-2020 թվականներին, ակնհայտ պասիվություն էր նկատվում։ Իհարկե սա պայմանավորված էր օբյեկտիվ իրողություններով, սակայն չափազանց կարևոր է այդ երկրի հետ այժմ հարաբերությունների ակտիվացումը։ Այս կոնտեքստում էլ ողջունելի է և՛ դեսպանի նշանակումը և՛ նախագահի կողմից նման ուղերձի ու հրավերի ուղարկումը Եգիպտոսի նախագահին»։
Այն պարագայում, երբ Հայաստանի դաշնակից պետությունը հայտվել է բարդ իրավիճակում և Հայաստանը արտաքին քաղաքականության այլ ուղիների, դիվերսիֆիկացման անհրաժեշտություն ունի, ինչքանո՞վ է կարևոր արաբական աշխարհի հետ համագործակցության ուղիների որոնումը հարցին ի պատասխան, Արմեն Պետրոսյանն ասաց․ «Չեմ կարծում, որ կարելի է նման համատեքստում դիտարկել, որովհետև այնուամենայնիվ Եգիպտոսը Հարավային Կովկասի զարգացումների հետ կապված էական հետաքրքրություններ չունի։ Բայց ընդհանուր առմամբ Եգիպտոսն ունի հետաքրքրություններ ու ակտիվ քաղաքականություն է վարում Մերձավոր Արևելյան տարածաշրջանում ակտիվանալու և տարածաշրջանային հիմնախնդիրներում ավելի լուրջ ու ազդեցիկ իր նախկին դերակատարումը վերականգնելու ուղղությամբ»։
Արաբագետի խոսքերով՝ Հայաստանի հետ հարաբերությունների ակտիվացումը բխում է նաև Եգիպտոսի շահերից․ «Քաղաքական առումով ընդհանուր մոտեցումները միաժամանակ մի քանի տարածաշրջանային հիմնախնդիրներում՝ հատկապես Մերձավոր Արևելքում Թուրքիայի ակտիվացումը, Սիրիայում, Հարավային Կովկասում Թուրքիայի վարած քաղաքականության հետ կապված Հայաստանի ու Թուրքիայի մոտեցումները բավականին մոտ են։ Ու դա հավելյալ խթան կարող է հանդիսանալ երկու երկրների միջև բավականաչափ պասիվացած համագործակցությունը կրկին ակտիվացնելու կոնտեքստում»։
Պետրոսյանի դիտարկմամբ՝ նախքան 2020 թվականի պատերազմը Հայաստան-Եգիպտոս հարաբերությունների զարգացման տեսանկյունից բավականաչափ կարևոր ազդակ էր ՀՀ նախկին արտգործնախարար Զոհրապ Մնացականյանի այցը Եգիպտոս․«Ես այն համարում եմ բավականաչափ հաջողված, բարձր մակարդակի հանդիպումներ տեղի ունեցան։ Ցավոք սրտի պատերազմի հետևանքով այդ ուղղությունը ևս տուժեց, զարգացում տեղի չունեցավ, ինչը բավականաչափ ցավալի է։ Բայց հետպատերազմյան շրջանում աստիճանաբար մեջքն ուղղող Հայաստանի համար կարևոր ուղղություն էր կիսատ մնացած կամ իր նպատակին չհասած նախկին քաղաքական ուղեգծերը՝ այդ թվում նաև Եգիպտոսի հետ հարաբերությունները կրկին ակտիվացնելու փորձերը, որի ականատեսն էլ մենք հիմա լինում ենք»։
