Չինաստանի իշխանությունները կոչ են արել Մեծ Բրիտանիային՝ դադարեցնել միջամտությունը Հոնկոնգի և Չինաստանի ներքին գործերին։ Այս մասին հինգշաբթի օրը կայացած ճեպազրույցում ասել է Չինաստանի ԱԳՆ խոսնակ Վան Վենբինը՝ մեկնաբանելով Հոնկոնգի վերաքննիչ դատարանից իր դատավորներին ետ կանչելու՝ Բրիտանիայի որոշումը, որը կապված է Չինաստանի այս հատուկ վարչական շրջանում ազգային անվտանգության մասին օրենքի ընդունման հետ։ «Չինաստանը խիստ դժգոհություն է հայտնում և կտրականապես դեմ է դրան»,- ասել է դիվանագետը՝ մեկնաբանելով համապատասխան տեղեկությունը։
Ինչպես նշել է Վենբինը, ազգային անվտանգության մասին օրենքն ուղղված է խիստ փոքրաթիվ հանցավոր տարրերի դեմ, որոնք վտանգում են ազգային անվտանգությունը։ Այն պաշտպանում է Հոնկոնգի բնակիչների մեծամասնության և օտարերկրյա քաղաքացիների օրինական իրավունքները, շահերն ու ազատությունները։ «Մենք բրիտանական կողմին խորհուրդ ենք տալիս՝ դադարեցնել իրենց անշնորհք քաղաքական ելույթներն ու միջամտությունը Հոնկոնգի և Չինաստանի ներքին գործերին»,- նշել է դիվանագետը։ Նա նաև հավելել է, որ Հոնկոնգում կայունությունն ու բարգավաճումը, օրենքի գերակայությունը խաթարելու ցանկացած փորձ դատապարտված է ձախողման։