Հարավային Օսիայի ինքնահռչակ հանրապետության նախագահ Բիբիլովը նախօրեին հայտարարեց, թե Հարավային Օսիան առաջիկայում քայլեր կանի Ռուսաստանի կազմի մեջ մտնելու համար: Բիբիլովը խոսել է հանրաքվեի մասին, ինչին արձագանքել են նաև ՌԴ Պետդուման: Պետդումայի պատգամավոր, ԱՊՀ, Եվրասիական ինտեգրացիայի և հայրենակիցների հետ աշխատանքի հարցերի Պետդումայի նախագահի առաջին տեղակալ Վոդոլոցկին հայտարարել է, որ հանրաքվեն կարող է լինել մայիս-հունիս ամիսներին: Պետդումայի նախագահի տեղակալի այդ հայտարարությունը վկայում է, հաստատում մի բան, ինչը թերևս կասկած չէր էլ հարուցում՝ Հարավային Օսիայի նախաձեռնությունը գալիս է հյուսիսից՝ Մոսկվայից: Ինչո՞վ է այն պայմանավորված, սա է գլխավոր հարցը:
Կասկածից վեր է և այն, որ դա Մոսկվայի բավականին կոշտ մեսիջն է Վրաստանին: Սակայն հարցն այն է, թե ինչո՞ւ է առաջացել դրա անհրաժեշտությունը, եթե նկատի առնենք և այն, որ Վրաստանը ուկրաինական պատերազմի ֆոնին Ռուսաստանի հանդեպ որդեգրել է բավականին զուսպ քաղաքականություն, հայտարարել է պատժամիջոցներին չմիանալու մասին, հայտնելով, թե դա չի բխում Վրաստանի շահերից: Չէ՞ որ այդ պարագայում Հարավային Օսիայի՝ ՌԴ կազմ մտնելու նախաձեռնությունը կստացվի Վրաստանի հակառակ դիրքորոշման հրահրում: Թե՞ Մոսկվան ունի տեղեկություններ Վրաստանի վրա հենց այդ հակառակ, այսինքն հակառուսական ընդգծված դիրքորոշման հասնելու ուղղությամբ ճնշման քաղաքականության մասին, ինչը կանխարգելելու նպատակով փորձում է կոշտ ազդակ հղել Թբիլիսիին: Բավականին բարդ է ասել, որովհետև իրավիճակը մեղմ ասած չափազանց խրթին է ու բազմաշերտ: Առավել ևս նկատի ունենալով այն, որ Աբխազիան արձագանքելով Հարավային Օսիայի նախաձեռնությանը նշել է, որ Աբխազիայում անկախության հանգամանքը ամրագրված է Սահմանադրությամբ և ոչ ոք հակված չէ փոխել այն: Ինչու՞ Աբխազիան ևս չի միանում Հարավային Օսիային, դա դեմարշ է Մոսկվայի՞ դեմ, թե՞ Մոսկվան առայժմ զգուշացնում է միայն Օսիայով, իսկ Աբխազիայի հանգամանքը կախված է նրանից, թե ինչպես կարձագանքի Վրաստանը՝ իհարկե իրական քաղաքական ռեժիմում, որովհետև ֆորմալ առումով Թբիլիսիի բացասական արձագանքը թերևս չի հարուցում կասկած:
Միաժամանակ, Աբխազիայի պարագայում գուցե ուշադրության է արժանի այն հանգամանքը, որ սևծովյան ավազանում գտնվող Աբխազիան ունի Թուրքիայում գտնվող, տարբեր հաշվարկներով մոտ մեկ միլիոն և ավելի «սփյուռք»: Արդյո՞ք Աբխազիայի հարցում մոտեցումն այլ է, քանի որ այստեղ կա Թուրքիայի հետ քննարկումների կամ պայմանավորվածությունների դաշտ: Համենայնդեպս, օսական նախաձեռնությունը խոսում է այն մասին, որ Վրաստանը գտնվում է բավականին լուրջ «ցիկլոնային» գոտում և բարդ է ասել, թե որ ուղղությամբ կլինեն հոսանքները:
