ԱՄՆ նախկին փոխդեսպան, միջազգայնագետ Արմեն Խարազյանը ֆեյսբուքյան իր էջում գրել է.
Հայկական հանրությունը քաղաքական ու հոգեբանական կոռուպցիայի մեջ է։ Թե՛ իշխանամերձ, թե ընդդիմադիր դաշտն անտրամաբանական վախի մեջ են ռուսներից, թուրքերից, ադրբեջանցիներից, ու ցանկացած այլ մեկից, որն իրենց հետ կուզի գործ ունենալ։ Սա առաջացրել է ռազմավարական պարալիզ։ Վախենում են զինվել, ռազմավարություն մշակել, ենթակառուցվածք ստեղծել, երկիր պահել։
Հայաստանն աշխատում է ռեակտիվ ռեժիմով՝ ընկալում է միայն դրսից եկող որոշ իմպուլսներ, սեփական իմպուլս էլ չի արձակում։ Տևական կամ գործնական արձագանք է տրվում հիմնականում Մոսկվայից եկող իմպուլսներին, երբեմն էլ սփյուռքի որոշ մասնավոր նախաձեռնությունների, որոնք ըստ իրենց ներդաշնակ են Մոսկվայի ցանկություններին։ Արդյունքում հողն ավազի պես շարունակում է ոտքերի տակից դուրս սողալ։ Սա պետք է փոխվի։
Սփյուռքի ու Հայաստանի ֆինանսական ռեսուրսները պետք է ուղղվեն այդ վախն ու պարալիզը հաղթահարելու և հանրային-պետական ռեաբիլիտացման նպատակին։ Կառավարությունը պետք է միանշանակ ու աներկբա հայտարարություն անի այն մասին, որ Հայաստանի անկախությունն ու տարածքային ամբողջականությունը, սեփական ռազմաքաղաքական ու տնտեսական հանձնառությունները սեփական կամքով ընտրելու կամ փոխելու ազատությունը, ինչպես նաև կենսականորեն անհրաժեշտ սահմաններում Արցախի ինքնորոշման իրավունքի իրականացումն անօտարելի են, ու որ Հայաստանի պետությունը հանձնառու է ու հետամուտ դրանց։
Հայկական քաղաքական կուսակցությունները պետք է սատարեն այդ հայտարարությանն ու իրենց քաղաքական պայքարն ուղղեն դրանց իրականացման նպատակին՝ այդտեղ մրցակցելով իշխանության հետ։ Ի՞նչն է մեզ պակասում սա անելու համար։