Հայաստանի ու Արցախի, առնվազն սահմանամերձ բնակավայրերի բնակիչներն արդեն գրեթե երկու տարի է ունեն իրենց համար կենսական նշանակության՝ կյանքի ու անվտանգության ապահովման իրավունքի խախտում։ Արցախյան վերջին պատերազմից հետո հայկական զինված ուժերը վերականգնելու կարիք ունենք։ Մաշված է ինչպես նյութատեխնիկական, այնպես էլ մարդկային ռեսուրսի բազան։ Եվ հենց այստեղ է, որ առաջ է գալիս նորարարական լուծումների ներդրման պահանջը։ Նորարարական մեզ համար, բայց ոչ աշխարհի։ Նոր ձևավորված բնագծերի տարբեր հատվածներում տեղակայված դիրքերում մենք ունենք մարդկային ներուժի ավելի նվազ հնարավորություններ, քան բնակչությամբ մեզնից 3 անգամ ավել Ադրբեջանը։
Առաջնային է դառնում դիրքապահ զինվորի թիկունքն ամուր պահող սահմանամերձ բնակավայրերի բնակիչների զինման հարցը։ Ինչ կփոխվեր սահմանի վրա, եթե պատերազմի ընթացքում սահմանամերձ գյուղերի տղամարդկանց բաժանվեին հրաձգային զինատեսակներ՝ թշնամու վրա կրակ բացելու քարտ-բլանշով։ 18-20 տարեկան ժամկետայինները վստահ կլինեին, որ ծայրահեղ իրավիճակներում իրենց օգնության կարող են հասնել տասնյակ գյուղաբնակ հայրենակիցներ՝ կոտրելով ադրբեջանցիների թվային առավելության գործոնն ու հնարավորություն ունենալ ատամներով պահել զբաղեցրած բնագիծը։
Մեր սահմանամերձ բնակավայրերի տղամարդկանց զենք բաժանելը ունի ոչ միայն ռազմավարական, այլև հոգեբանական կարևոր նշանակություն։ Հայաստանը պարտավոր է դառնալ միլիտարիզացված պետություն, որի նկատմամբ ագրեսիա պլանավորող 1 անգամ մտածելու փոխարեն 1000 անգամ կմտածի՝ գործելուց առաջ։ Որևէ ադրբեջանական դիվերսիոն միավոր չի տենչա մտնել հայկական գյուղ, եթե իմանա, որ այդ գյուղի ամեն տան տղամարդու ձեռքին ամբողջությամբ լիցքավորված ԱԿ-74 ինքնաձիգ կա։ Մեր սահմանը պահող հայրենակիցներն իրենց ավելի ապահով կզգան, իսկ սահմանապահ զինվորները՝ ավելի վստահ։ Չկարծեք, թե դա նախնադար է։ Ընդհակառակը։ Մի քանի թիվ աշխարհի գերզարգացած երկրներից։ Մենք չպետք է խուսափենք պաշտպանվել։ Պաշտպանությունը կենսական իրավունք է։ Ինքնապաշտպանությունը մերօրյա Հայաստանում ամենաառաջնային պահանջն է։ Զինվել է պետք, զինել է պետք սահմանային բոլոր բնակավայրերի տղամարդկանց ու վստահություն սերմանել, որ ազատ են պաշտպանել իրենց տունը, ընտանիքը, զավակին՝ թշնամու հավանական ոտնձգությունից։